Веб-страница за ликот и делото на Стефан Сидовски-Сидо: Во неговиот дом се пронајдени 242 испишани т

19.02.2021 februari petok

По смртта на Стефан Сидовски-Сидо – долгогодишен, многупочитуван и искрено сакан професор по философија и филм, во неговиот дом беа пронајдени двесте четириесет и две целосно испишани тетратки од различен формат, чиј вкупен број на страници, во ракопис, не е помал од триесет и пет илјади. Од желбата истите прерано да не му припаднат на неизбежниот заборав, а со тоа да биде и неправедно обесмислен повеќедецениски интроспективен напор на една исклучителна личност, се роди идејата за веб-страница посветена на овој исклучителен човек и вљубеник во филмската уметност.

Самата веб-страница, која е резултат на посветеноста на негови роднини, пријатели, соработници и ученици, е замислена како сеопфатна дигитална архива која содржи и дел од објавените текстови на Сидо, речиси сите негови аматерски филмови (како и неговиот единствен професионален филм „Образ“), неколку интервјуа и излагања по различни поводи и сосема мал избор од туѓи сведоштва и спомени за неговиот живот и дело.

„Од досега откриените ракописи, овде се споделени сите тетратки освен дводецениските Дневници (од кои, во догледна иднина и од почит кон сè уште живите, ќе бидат објавувани само селектирани и делумно редактирани преписи) и еден шеснаесеттомен тематски циклус афористички размисли за филмот за кого можеме да бидеме сигурни дека Сидо имал намера да го уреди и отпечати како книга (за што и дискутирал, во месеците непосредно пред својата смрт, со Лазар Фотев, сопственикот и основач на издавачката куќа „Аз-буки“). Од она што го знаеме засега, ова е еден од одвај неколкуте разговори во кои Сидо го споделил со некого постоењето на овие тетратки“, е напишано на веб-страницата сидо.мк.

Инаку, Сидовски почина во 2019 година. Цели 36 години беше професор во гимназијата „Раде Јовчевски Корчагин“, а предаваше историја на филм и теорија на филм во ЕСРА.