Јубилејната изложба „Иван Велков, 90 години од раѓањето“ во Чифте амам

03.03.2021 mart sreda

Во Чифте амам на 4 март ќе биде отворена Јубилејната изложба „Иван Велков, 90 години од раѓањето“. На изложбата ќе бидат претставени 90тина дела од сите творечки фази на Велков, а публиката ќе може да ја посети до крајот на месецот.

Велков (1930, Врање – 2008, Скопје) спаѓа во рангот на еминетните македонски сликари, воедно и универзитетски професор, припадник на повоената генерација уметници, кој одигра особено значајна улога за развојот на македонското сликарство во 1960-тите години.

„Тој е еден од најзначајните македонски автори бидејќи со своето творештво внесе сопствени иновации, но и дел од движењата од светската ликовна сцена кај нас. Во историјата на македонската ликовна сцена Велков е забележан како автор на препознатливи дела со експресионистичка, кубистичко-конструктивистичка, геометриска и лирска апстракција. Заедно со својот колега Петар Мазев биле иницијатори за формирање на познатата ликовна група ‘Мугри’ во која членувале и Богољуб Ивковиќ, Ристо Калчевски, Димитар Кондовски, Спасе Куновски, Ристо Лозаноски и повремено Томо Шијак. Настапите на групата не поминуваат незабележани од тогашната југословенска критика. Сумирано, значењето на Велков за македонската историја на уметност е во неговата немирна истражувачка природа и желба за внесување на новитети во сликарството и подигањето на ликовната уметност на ново, современо рамниште. Неговото карактеристично творештво се издвојува со повеќеслојноста во истражувањата на ликовните можности на сликата, начинот на дисциплинирано и хармонично градење на композицијата од мноштво нови елементи, новитети за дотогашната уметност кај нас, но и внесување на стилизирани традиционални етнолошки елементи преку своевидно ‘ткаење’ на површината на сликата“, ќе посочат авторките на изложбата Маја Чанкуловска-Михајловска и Маја Неделкоска Брзанова.

Иван Велков учествувал на голем број групни изложби во земјава и во странство и е добитник на повеќе награди.