Спилберг ќе снима филм за сопственото детство

Иако неговата филмска адаптација на мјузиклот „Приказна од Западот“ допрва треба да излезе на крајот на годината, славниот режисер Стивен Спилберг веќе го планира својот следен филмски ангажман. Дедлајн ја објави веста дека Спилберг планира да сними филм инспириран од неговото детство во Феникс, Аризона.

Исто така, постојат големи шанси главната женска улога, инспирирана од мајката на Спилберг, да ја игра познатата актерка Мишел Вилијамс.

Со оглед на тоа што за прв пат ќе снима целосно лична приказна, Спилберг одлучи да учествува во пишувањето на сценариото за филмот заедно со неговиот долгогодишен соработник Тони Кушнер.Тоа ќе биде првиот филм што го напишал од филмот „Вештачка интелигенција“ во 2001 година.

Снимањето на овој сè уште неименуван филм се очекува да започне на лето, по што се очекува да биде објавен во 2022 година.