Само ракоплескање додека минува олимпискиот факел

01.03.2021 mart ponedelnik

ЗА ЛОИ ВО ТОКИО

Луѓето што ќе се сакаат да го видат олимпискиот факел за време на неговото патување низ Јапонија на крајот од идниот месец ќе бидат замолени да аплаудираат, наместо да ги бодрат тркачите што поминуваат покрај нив, а настанот може да биде прекинат ако толпата што се наоѓа на поставената патека премногу се зголеми. Се очекува на овој настан да учествуваат десетици илјади спортисти, официјални лица и новинари, пишува британскиот дневен весник „Гардијан“ на својата интернет-страница. Организацискиот комитет (ОК) на Игрите во Токио соопшти дека ќе го пренесува овој чин на штафетата во живо на 25 март од Фукушима и ги охрабри луѓето тоа да го гледаат од дома. Околу 10.000 носители на олимпискиот факел ќе го носат престижниот симбол на Игрите низ 859 локации во јапонските 47 префектури, што ќе кулминира со неговото пристигнување на главниот олимписки стадион на 23 јули. – Без викање, без навивање. Ве молам, навивајте со плескање на рацете и одржувајте соодветно растојание во случај на пренатрупаност. Ако се покаже дека има густа толпа на улиците, движењето на факелот може да се запре, оти ние ѝ даваме приоритет на безбедноста – рече Јукихико Нуномура, заменик-генерален директор на ОК, на неодамнешниот брифинг со медиумите.