Ред бул не успеаја да издејствуваат дополнителна казна за Хамилтон

Ред бул рејсинг не успеаја во обидот да му се додели поголема казна на Луис Хамилтон за судирот со Макс Ферстапен во Силверстоун, откако стјуардите ја потврдија одлуката за 10-секундна казна, која на крајот не му пречеше на Хамилтон да победи на домашната трка по судирот со Холанѓанецот.

Пред Унгарското ГП овој викенд, повторно главна тема беше судирот во првиот круг на кривината Корпс, откако Ферстапен продолжи да го обвинува Хамилтон и Мерцедес за неспортско однесување со прославата на победата додека тој бил во болница.

По дополнителното сослушување кај стјуардите во четвртокот попладне, тие одлучија дека нема потреба за менување на првичната одлука. Во извештајот на стјуардите се вели дека новите докази на Ред бул биле низа слајдови на кои беа поставени линии на движење на двата болиди, кои не биле доволни за дополнителна казна.