Повик на МСУ за учество на 13. Биенале на млади уметници

01.03.2021 mart ponedelnik

Музејот на современа уметност во Скопје упати повик за учество во биналето за млади уметници на возраст од 18 до 35 години.

Повикот трае до 20 март 2021 година и е наменет за македонски и странски автори, на тема „Страст за лутање“.

„Ги покануваме младите уметници на движење без цел. Покануваме ‘скитници’ со надеж дека ова движење неочекувано ќе открие и ќе дојде до нови територии. Територии кон кои може колективно да се движиме и да пронајдеме некаква случка, новина. Главната тема на ова Биенале на млади уметници е немање цел за ништо конкретно во сегашната состојба на нештата во светот, туку желба сè да биде другаде. Сè што може да се случи таму. А, работите обично се случуваат кога се движиме. Без поставена цел, сè може да се случи“, посочуваат од МСУ.

Како што наведуваат оттаму пријавите ќе може да се испраќаат во електронска форма на македонски и англиски јазик на: info@msu.mk, со назнака: Пријава за Биенале на млади уметници. Апликацијата треба да содржи опис на делото, кратка биографија до 500 зборови, фотографии од делото со податоци за наслов, година, техника и димензии, како и листа на потребна опрема за техничка реализација и инструкции за инсталација на делото. Авторите конкурираат со едно свое дело настанато во периодот од 2018 – 2021 година.

Биеналето оваа година ќе се одржи од 5 мај до 1 септември 2020, во Музејот на современата уметност – Скопје, а резултатите од конкурсот ќе излезат до 1 април оваа година.