На север на Камчатка масовен помор на ирваси

Во северниот дел на полуостровот Камчатка, во Русија, деновиве дојде до масовно угинување на ирваси. Причина може да биде тоа што животните ги напуштиле стадата и заталкале, поради што не можеле да се прехранат, соопшти регионалната влада.

Претходно, на социјалните мрежи се појави снимка од мртвите животни, а нејзиниот автор наведе дека имало околу 300 трупа на мртви ирваси, што е вистинска катастрофа.

Во тундрата во регионот Тигил, со хеликоптери деновиве ќе слета тим од стручњаци, кој треба да ги открие причините за инцидентот, а проверка на фактите веќе почна и регионалното обвинителство.

На Камчатка егзистираат девет претпријатија за одгледување ирваси, а на крајот на минатата година имало повеќе од 43.000 единки.