Луда иновација: Лу Дорт со откачена дефанзивна техника го „хипнотизираше“ Леброн

11.02.2021 februari cetvrtok

Колку и да звучи чудно и неверојтано, Лос Анџелес Лејкерс трет меч во низа добива по одиграни продолжение, а вторпат во серија против тимот на Оклахома кој одново беше блиску до големо изненадување, но сепак не успеа да го шокира шампионот.

Тандерси пред два дена ги натераа „езерџиите“ да играат дополнителни пет минути игра, а тоа го направија и изминатава вечер, во која сепак немаа доволно сили во продолжението и на крајот повторно им подадоа рака на подобрите ривали, иако го имаа последниот напад во своја корист (114:113).

Леброн Џејмс одново не остави ништо на случајноста, па по трипл-даблот од пред два дена денеска продолжи со 25 поени, 6 скокови и 7 асистенции, кои сепак останаа во блага сенка во споредба со дефанзивната техника која ја прикажа еден негов ривал на теренот во последната интересна акција во продолжението.

Канадскиот кошаркар Лу Дорт демонстрираше како може да се деконцентрира „Кралот Џејмс“ во ситуација кога сака да си создаде простор за шут, односно му мавташе со рацете во лицето и навистина успеа во замислата, односно го сопре налетот на најдобриот играч на Лејкерс.

Од другите НБА паркети, за издвојување е третата победа во низа која ја оствари Далас, овојпат со тесен триумф над Атланта од 118:117 во меч во кој Лука Дончиќ блескаше со трипл-дабл, или поточно со 28 поени, 10 скокови и исто толку асистенции.