Куман: Постапивме правилно што го продадовме Суарез, би променил само една работа

02.02.2021 januari vtornik

Роналд Куман никако не успеава да ја избегне темата „Луис Суарез“, а за тоа вината може комотно да се бара и кај Уругваецот кој игра брилијантна сезона во Атлетико Мадрид по директниот трансфер кој го направи од „Камп Ноу“.

Суарез е најдобар голгетер во шпанската Примера со 14 постигнати погодоци и тоа секако остава трага и ја доведува во прашање трансфер политиката на клубот од Каталонија, без оглед на тоа што Куман и натаму потенцира дека Барселона направила добра одлука со продажбата на искусниот голгетер.

– Ние сме во процес на правење промени во клубот и се уште сметам дека такви тешки одлуки требаше да донесеме. Не беше лесно да се ослободиме од Суарез, но тоа беше важна одлука и се уште мислам дека постапивме правилно, – вели Куман во интервјуто за „Атлетик“.

Сепак, Холанѓанецот признава дека би направил само една промена кога е неговиот трансфер во прашање, односно нагласува дека ќе било подобро да замине во Јувентус, отколку во Атлетико Мадрид.

– Би направил само една промена, секако дека ќе беше подобро да оди во Јувентус отколку во Атлетико Мадрид. Тој остана во Ла Лига и сега е наш противник, – додава Куман.