Златни глобуси за филмовите „Земја на номадите“ и „Борат 2“ и серијата „Круната“

01.03.2021 februari ponedelnik

Што се однесува до продукциите, ниту едно студио или стриминг платформа не однесе толку награди колку „Нетфликс“. Јасно е дека доминацијата на „Нетфликс“ не треба да изненадува, бидејќи додека во пандемиската година другите студија и мрежи се бореа филмовите да ги претстават во кината, „Нетфликс“ ‘стримаше’ ново издание (филм или ТВ серија) речиси секоја недела во текот на 2020 година

Драмата за жената која губи сè во Големата рецесија и тргнува на патување низ американскиот запад, живеејќи како современ номад во комбе – „Земја на номадите“ (Nomadland) го доби „Златниот глобус“ за најдобар филм-драма, а сатирата „Борат 2“ (Borat Subsequent Moviefilm), пак, ја доби наградата за најдобар филм во категоријата музикл или комедија.

Годинава на 78. по ред „Златен глобус“, кој со задоцнување од повеќе од еден месец истовремено се одржа викендов во Лос Анџелес и Њујорк, секако изостана гламурот на свеченото доделување и плејадата познати актери на црвениот килим. Доделувањето за првпат се случуваше онлајн, со почитување на мерките на светска пандемија од ковид-19 и во знакот на повиците за поголемо почитување на различностите.

И режисерката на филмот „Земја на номадите“ Клои Жао се закити со „Златен глобус“. Таа ја доби наградата за најдобар режисер, со што стана втората жена и прва Азијка што го освоила „Златниот глобус“ во оваа категорија.

Авторот на „Борат 2“, Саша Барон Коен, пак, е прогласен за најдобар актер во категоријата музикл или комедија, додека пак, починатиот Чедвик Боузман постхумно е одликуван како најдобар актер во категоријата драма за неговата последна улога во џез-драмата „Ма Рејни: Мајка на блузот“ (Ma Rainey’s Black Bottom). Sвездата на „Црниот пантер“ Боузман, за кого не се знаеше дека боледува од рак, почина минатата година на 44 години со што ги шокираше неговите обожаватели.

Кај актерките, пак, Андра Деј ја доби наградата за најдобра актерка во категоријата драма за улогата на пејачката Били Холидеј во „САД против Били Холидеј“ (The United States vs. Billie Holliday), додека Розамунд Пајк се закити со „Златен глобус“ за најдобра актерка во категоријата музикл или комедија за „Јас многу се грижам“ (I Care A Lot).

Од многуте номинации и категории, може да се издвои и познатата актерка Џоди Фостер која беше наградена за својата споредна улога во филмот „Мавританец“ (The Mauritanian), анимираниот филм „Соул“ кој беше прогласен за најдобар во својата категорија, како и јужнокорејскиот „Минари“ како најдобар странски филм.

Џејн Фонда, како што претходно беше најавено, ја доби наградата „Сесил Б. Демил“ за нејзиниот извонреден придонес во филмската индустријата, а ТВ-пионерот Норман Лир, пак, наградата именувана по легендарната Керол Барнет, за својата долга телевизиска кариера.

Интересно е дека драмата „Манк“ (Mank) во режија на Дејвид Финчер која водеше со шест номинации кај филмските остварувања на годинешните „Златни глобуси“, не освои ниту една награда. Осварувањето го преиспитува Холивуд во 30-тите години на минатиот век низ очите на остриот општествен критичар и сценарист-алкохоличар Херман Ј. Манкиевич додека тој е во трка да го заврши сценариото за филмот „Граѓанинот Кејн“ (1941) на коешто се потпишува како коавтор заедно со Орсон Велс.

Што се однесува до телевизиските категории, пак, британската драма за кралското семејство „Круната“ (The Crown), комедијата „Шитс Крик“ (Shitt’s Creek) и шаховската минисерија „Движењето на кралицата“ (Queen’s Gambit) ги освоија главните награди. Meѓу победниците беа и Ема Корин која ја глуми младата принцеза Дајана, Џош О’Конор, за улогата на принцот Чарлс и Џилијан Андерсон, која ја толкува Маргарет Тачер во серијата „Круната“ на Нетфликс.

По повеќе од една година, која беше година на постојани одложувања на филмови и телевизиски продукции кои се во застој, не е изненадување што победници на „Златниот глобус“ се филмови кои се прикажуваа на стриминг платформите.

Притоа, ниту едно студио или стриминг платформа не однесе толку награди колку „Нетфликс“. Јасно е дека доминацијата на „Нетфликс“ не треба да изненадува, бидејќи додека другите студија и мрежи се бореа филмовите да ги претстават во кината, „Нетфликс“ имаше ново издание (филм или ТВ серија) речиси секоја недела во текот на 2020 година.

Иако пандемиски, „Златниот глобус“ не помина без неколку скандали како истрагата за сомнително етичко гласање на сите 87 членови на Здружението на странски новинари на Холивуд (Hollywood Foreign Press Association – HFPA), гласачкото тело што ги избира победниците на „Златен глобус“, како и критиките за тоа дека немаат црномурести членови. (Н.И.Т.)