ДПМ: Именувањето улици по Блаже Конески и Славко Јаневски ќе придонесе за нивна популаризација

31.03.2021 Mart Sreda

„Со тоа се зацврстува местото на овие значајни творци во нашата колективна меморија и воедно се поттикнува интересот и респектот на сите генерации граѓани за литературното творештво и за неговите создавачи“, посочи Друштвото на писателите на Македонија за иницијативата на Град Скопје за именување на улици по македонски автори „Институтот за македонски јазик ‘Крсте Мисирков’ го изразува своето задоволство од одлуката на Град Скопје една улица во централното градско подрачје да го носи името токму на Блаже Конески, кодификаторот на современиот македонски јазик, меѓународно ценет лингвист, визионер, мислител, поет и препејувач од светски ранг“, посочи Институтот со што ја даде својата поддршка на Град Скопје за именувањето на улица во централното градско подрачје со името на великанот Блаже Конески. Како што истакнуваат од Институтот за македонски јазик „Крсте Мисирков“ Блаже Конески е најголемиот корифеј на македонската култура со светско реноме и еден од втемелувачите на современиот македонски идентитет. „Конески ги препозна нијансите на словенската, но и на македонската (со сите свои специфики) народна култура, традиција, наука и реторика. Во Годината на Конески срдечно ја поздравуваме одлуката на Град Скопје, заедно со името на Крсте Мисирков, името на Блаже Конески да го носи улица од централното градско подрачје. Ова е порака до граѓаните на Скопје со која Блаже Конески останува наша инспирација и гордост“, се вели во писмото од оваа институција. Од Фондацијата „Славко Јаневски“, пак, Град Скопје доби поддршка за именувањето улица во централното градско подрачје со името на познатиот македонски писател и автор на првиот роман на македонски јазик чие име тие го носат. Притоа, Фондацијата за унапредување и промоција на културните вредности преку писмо го изрази своето задоволство од одлуката на Град Скопје една улица да го носи името токму на Славко Јаневски, еден од најголемите корифеи на македонската култура и еден од втемелувачите на современиот македонски идентитет. „Името на Славко Јаневски последните десетина години беше во континуитет изложувано на политичка дефамација, со тенденција авторот на првиот македонски роман, наместо да влезе како бележит симбол на македонската колективна меморија, тој да помине во колективен заборав. Во таа смисла, ја поздравуваме и поддржуваме оваа одлука на актуелната владејачка гарнитура на Град Скопје, сметајќи ја за мал, но вистински чекор за зачувување на ликот и делото на овој великан. Затоа го охрабруваме Град Скопје, но и другите одговорни фактори да продолжат во оваа насока за негување на сопствените цивилизациски дострели. Истовремено, Фондацијата изразува подготвеност, во зависност од потребите и во зависност од сопствените капацитети, да помогне во реализацијата на овие процеси“, посочуваат од Фондацијата. Поддршка за именување улици со имиња на починати македонски писатели Град Скопје доби и од Друштвото на писателите на Македонија. „Македонската писателска асоцијација ја поддржува и поздравува иницијативата на Град Скопје да именува неколку улици во нашиот главен град според починати македонски писатели. Со тоа се зацврстува местото на овие значајни творци во нашата колективна меморија и воедно се поттикнува интересот и респектот на сите генерации граѓани за литературното творештво и за неговите создавачи. Се разбира, литературните дела на писателите како сегмент на националната култура се инкорпорирани во образовниот процес и во другите јавни дејности, но веруваме дека и зачестеното спомнување и чествување на писателите преку именувањето улици во главниот град ќе придонесе за нивна популаризација и пошироко восприемање. Особено затоа што многу стихови, романи и раскази во нашата литература се посветени токму на градските амбиенти на Скопје и се неизбришливо вградени во неговиот урбан културен идентитет“, истакнуваат од ДПМ. Кон поддршката се приклучи и Институтот за македонска литература. За весникот ВЕЧЕР директорката на Институтот Маја Јакимовска-Тошиќ посочи дека секако се приклучуваат на поддршката бидејќи и Блаже Конески и Славко Јаневски се великани на македонската литература. „Особено во Годината во чест на Блаже Конески сметаме дека и на овој начин треба да се одбележи големото дело на кодификаторот на современиот македонски јазик. Конески беше и автор и творец, еден од нашите најугледни и најзначајни писатели. Целата оваа 2021 изобилува со низа манифестации во чест на Конески, и ова го сметаме како уште еден прилог, уште една активност кон одбележувањето и чествувањето на големиот јубилеј, 100 години од неговото раѓање“, истакна Јакимовска-Тошиќ. Директорката посочи и дека на 29 и 30 јуни ќе се одржи голема манифестација со која ќе се одбележат 40 години – Институт за македонска литература и 100 години од раѓањето на Конески. „Тоа ќе биде меѓународен симпозиум насловен ‘Македонска книжевна архива – од ракопис до дигитална библиотека’, во чии рамки ќе се одржи специјална сесија ‘Книжевната архива на Блаже Конески’“, додаде таа. (Н.И.Т.)