Во чест на Тоше Проески, Никола Зацески ја преработи „За овој свет“

25.01.2021 januari ponedelnik

Македонскиот пејач Никола Зацески, кој веќе неколку години живее и работи во Австралија, во соработка со австралиската хуманитарна организација „Play Without Boundaries“ и оваа година традиционално, но со специјални протоколи успешно го поставија најновото издание на хуманитарниот концерт „Детска насмевка“, во чест на нашата најголема музичка ѕвезда Тоше Проески.

Оваа година на хуманитарниот концерт учество зедоа: Никола Зацески – вокал, Крис Чагоровски – кларинет/саксафон, Владо Вики – клавијатура. Концертот е снимен во „ИН ТВ студио“ во Мелбурн, Австралија

Покрај хуманитарниот концерт, Никола Зацески во чест на 40-от роденден на Тоше, направи и преработка на песната „За овој свет“, во продукција на Николче Мицевски.

– Со желба целиот настан да добие што поголемо значење со огромна чест и задоволство ја снимив преработката на Тошевата „За овој свет“. Тоа е најмалку што можам за да ја искажам мојата огромна почит за човекот кој несебично покажа како се пее, помага, сака, почитува и најважно како е да се биде човек пред се. Среќен роденден ангелу наш, твоите песни и дела никогаш нема да дозволиме да згаснат. За разлика од изминатите години, оваа година хуманитарниот концерт во чест на Тоше, заедно со мојот тим од „Play Without Boundaries“ го остваривме во посебни услови и со посебни протоколи и е достапен за сите фанови онлајн. Комплетниот приход од овој проект е наменет за помош на организацијата „Детелинка плус“. Сакам лично да се заблагодарам до мојот тим, моите колеги музичари, видео продуценти, спонзори, медиуми и сите други што помогнаа во оваа тешка година да го реализираме овој голем проект кој има преголемо значење за мене – вели Никола Зацески. М.Т.