Велешкиот театар во потрага по автентичниот македонски театарски модел

„Проектот ‘Да се почне одново’ е многуслоен, вклучува голем број партнери и соработници, домашни и странски, а разложен е во временски рок од три години. Еден од зацртаните деривати на овој проект кон кој ќе се цели со концепт за долгорочна одржливост, е создавање дигитална енциклопедија на македонскиот театар“, вели за весникот ВЕЧЕР директорот на Велешкиот театар Сашо Димоски

Народниот театар „Јордан Хаџи Константинов-Џинот“ од Велес со претставата „Кралските копилиња“ во режија на Сашо Димоски неодамна настапи на затворањето на 47-то издание на фестивалот „Сараевска зима“. Фестивалот се оддржа онлајн, односно претставите се прикажуваа на матичните сцени, а сараевската публика можеше да ги проследи преку видео стриминг

„Претставата е дизајнирана на принципот ‘сцена-екран’ и визуелизацијата која ја нуди е податлива за онлајн прикажување. ‘Сараевска зима’ е прекрасен фестивал и се обидуваме да градиме стратегии за долгорочна соработка, а Сараево е тло со кое градиме мостови. Некои од нив веќе ги реализираме, добивајќи покана за учество на ‘Олимпијадата на кулурата’ во Сараево во мај годинава, како и ланското учество на фестивалот ‘Град’ со интернет-проектот ‘Тој и Таа’“, вели за весникот ВЕЧЕР Сашо Димоски, кој воедно е автор и на текстот и на аудио-визуелниот концепт на претставата. Тој исто така се надева дека здравствените услови ќе го дозволат учеството на „Олимпијадата на културата“ во Сараево годинава.

Инаку, претставата „Кралските копилиња“ жанровски е театар на телото во епски слики, работена според пост-тројанскиот митски циклус, сместен во кралската куќа Арг. Тоа е приказна за боголуѓето која се случува непосредно по завршувањето на војната за Троја и зборува за неможноста траумата да биде избришана како цивилизациско наследство и за кругот преку кој таа траума комуницира со секое време и простор. Во неа настапуваат актерите Васил Зафирчев како Агамемнон, Кети Борисовска како Клитемнестра, Талија Настова како Електра, Жарко Спасовски како Орест, Маја Љутков како Касандра, Фаик Мефаилоски како Егист и Марија Стефановска како Ифигенија. Режијата на сценското движење е на Васил Зафирчев, видео-дизајнот и анимациите се на Данчо Стефков и Крсте Шупев, сценографијата е на Филип Коруновски, костимографијата на Катерина Чукниева, музички соработник е Сашко Костов, а автор на дигиталните скулптури е Адам Мартинакис.

Неодамна, Велешкиот театар „Јордан Х. К. Џинот“, чиј директор е Сашо Димоски ја претстави и програмата за оваа сезона, насловена „Да се почне одново“, која се одликува со иновативност и креативност. Насловот на сезоната произлегува од театролошкиот проект, а којшто Велешкиот театар ќе го реализира во соработка со шест национални театри, исто толку независни субјекти од културата, четири реномирани театарски фестивали и издавачката куќа „Арс ламина“. Целта на проектот, кој го предводи професорката Јелена Лужина, заедно со експертски тим од неколку домашни и меѓународни театролози, е да истражи која е и каква е потребата од промена на македонскиот театар во потрагата по неговиот автентичен модел низ европските стандарди.

„Проектот е многуслен, вклучува голем број партнери и соработници, домашни и странски, а разложен е во временски рок од три години. Еден од зацртаните деривати на овој проект, дериват кон кој ќе се цели со концепт за долгорочна одржливост, е создавање дигитална енциклопедија на македонскиот театар. Покрај тоа, издавачката куќа ‘Арс Ламина’ ќе публикува и серија книги кои ќе произлегуваат од истражувањата кон институционалните и неинституционалните театарски субјекти, како и значајните фестивали. Предвидено е првото јавно претставување на истражувањето да се случи во рамки на годинешното издание на МОТ на панел-дискусија“, ни појаснува нашиот соговорник Димоски.

Во рамки на годинешната програма на Велешкиот театар предвидено е да се реализираат и четири тетарски продукции. „Во продукција е претставата со работен наслов ‘Четири соби’, во режија на Синиша Евтимов и визуелно обликување на Александар Ношпал, а премиерата е планирана за средината на следниот месец. Во рамки на процесот на создавањето на претставата се прави и работилница, со наслов ‘Од филмско сценарио до театарска претстава’. Претпродукциски активности се почнати и за проектот ‘Петтото годишно време’, танцтеатарска претстава во режија на Васил Зафирчев, а во изведба на Олга Панго, чија премиера е предвидена за јуни годинава и во чии рамки ќе се одржи и работилница за танцтеатар“, вели Димоски.

Како што нè информира тој, следната претстава на Велешкиот театар е копродукција со Националната опера и балет, Есхиловата „Орестија“ со чија премиера е планирано да се отвори годинешното издание на ИФАД Стоби, во јули годинава. „Четирите делови од тетралогијата ги режираат Александар Ивановски, Ненад Витанов, Софија Ристевска-Петрушева и Деан Дамјановски“, додава Димоски посочувајќи дека за втората полусезона, пак, е предвидена театарската инсталација „Квартет“ според Милер, во режија на Деан Дамјановски. Инаку, преку Годишниот конкурс за остварување национален интерес во културата поддржани се претставите „Орестија“, „Четири соби“, годинешното издание на ИФАД „Стоби“ и проектот „Да се почне одново“. Останатите продукции Велешкиот театар ќе ги реализира со сопствени ресурси. (Н.И.Т.)