„Боженствениот звук на Малер“ во Филхармонија

„Боженствениот звук на Малер“ е насловот на концертот којшто ќе се одржи на 1 април во 19 часот во Филхармонија. Оркестарот на Филхармонија под диригентската палка на маестро Габриел Бебешелеа, овој четврток ќе ја изведе Четвртата симфонија, ремек дело на австрискиот композитор Густав Малер. Како солистка ќе настапи сопранистката Милена Арсовска.

Симфонијата е во аранжман на Иан Фарингтон кој ја адаптира за изведба со помал оркестарски состав. Задржувајќи го карактерот на оригиналното дело и третирајќи го секој изведувач како солист, Фарингтон успева да ги открие и оние помалку скриени аспекти на Симфонија бр. 4, кои слушателот тешко може да ги забележи при изведбата на оригиналното дело.

Сопранот Милена Арсовска е една од најистакнатите македонски вокални уметници од поновата генерација, со успешна меѓународна кариера. Минатата сезона, Милена Арсовска настапи во главната улога во операта „Славеј“ од Стравински во Националната опера во Прага, а концертните турнеи ја водат низ Германија, Италија, Шведска, Шпанија, Франција, Малта, Холандија и САД. Моментно е дел од продукцијата „Свадбата на фигаро“ во престижната опера во Вајмар. Нејзиниот глас е искористен и во музиката за македонските филмови „Големата вода“ и „Војната заврши“.