Актерот Пирс Броснан за првпат во улога на суперхерој

Актерот Пирс Броснан, најпознат по улогата на Џејмс Бонд – агентот 007, ќе ја одигра својата прва улога како суперхерој.

Имено, глумецот ќе ја толкува улогата на д-р Фејт (Судбина) во „Црниот Адам“ – филм со Двејн Џонсон во насловната улога на продукциските куќи „ДиСи“ и „Њу лајн“. Инаку, д-р Фејт, со алтер-его Кент Нелсон, е основач на „Друштвото на праведните“ кој добива супермоќи преку „волшебниот шлем на судбината“.

Во останатите улоги во филмот ќе настапат: Алдис Хоџ (како Хокман), Ноа Сентинео (Атом Смашер), Квинтеса Свиндел (Сајклон).

„Црниот Адам“ е приказна за истоимениот антихерој, кој ќе го глуми Двејн Џонсон. Ликот првпат се појави во стриповите на ДиСи (DC) во 1940-тите, како негативец заведен од својата моќ од третото илјадалетие.

Филмот е во режија на Жом Колет-Сера. Рори Хајнс и Сохраб Ноширвани го напишаа последниот нацрт на сценариото, а Адам Штикиел го напиша првичното сценарио.

Пирс Броснан лани глумеше во комедијата „Евровизија“ на Вил Ферел.