Џоркаеф посочи што Тирам ќе му донесе на Интер: Како и неговиот татко…

Маркус Тирам имаше повеќе понуди на негова адреса во летниот преоден рок, а со оглед на тоа што беше слободен фудбалер можеше сам и без притисок да ја одбере новата дестинација во кариерата, поточно неговиот избор беше преселба во редовите на актуелниот европски вицешампион Интер.

Тој полека се прилагодува на новата средина, земјата, шампионатот во кој голема трага остави неговиот татко Лилијан играјќи за Парма и Јувентус.

Тирам веќе почна да дава голови за Интер, да асистира, па Јури Џоркаеф како ас кој ја прати кариерата на напаѓачот даде мислење за тоа како ќе се одвива неговата приказна на „Џузепе Меаца“.

-Често зборувам со Лилијан, исто така и за кариерата на Маркус. Тој е свеж воздух за „нероаѕурите“. Џеко две години добро се снајде на таа позиција, додека Лукаку имаше подеми и падови. Веднаш му испратив порака кога потпиша за Интер и оттогаш го следам.

-Мислам дека Интер е идеален клуб за него. Тој се приклучи на уникатен тим и верувам дека ќе стане еден од најдобрите играчи во лигата доколку се прилагоди. Не се сомневам дека тоа ќе го направи. Како и неговиот татко Лилијан, тој е ментално солиден што е клучен фактор за да стане врвен играч, -порача Јури за „Газета Дело Спорт“.