Љубојно и Курбиново – приоритет во заштитата на македонскиот јазик и културното наследство

„Владата, Министерството за култура и Завод и музеј Битола презедоа обврска – објектот кој денес има имотен лист 55, да заживее во чест на македонските дејци и во спомен на сите просветни работници. Да стане собиралиште на лингвистите, педагозите, наставниците и професорите по македонски јазик и да остане како паметник за генерациите по нас дека темелите на ова здание се всушност историски темели на образованието на мајчин, македонски јазик, столбот на нашиот идентитет“, истакна при вчерашната посета на старото училиште во Љубојно, министерката Костадиновска-Стојчевска. Таа заедно со премиерот Ковачевски ја посетија и црквата во Курбиново

Сите неопходни чекори за реконструкција и ревитализација на првото македонско училиште во Преспа – „Димитар Влахов“ во Љубојно и негова адаптација во „Центар за промоција на македонскиот јазик“, според министерката за култура Бисера Костадиновска-Стојчевска, се започнати. Овој објект, кој во моментот е запуштен, без покрив, со урнати ѕидови и со коров во својата внатрешност, вчера беше посетен од премиерот Димитар Ковачевски и министерката Костадиновска- Стојчевска.

„Ќе се послужам со зборовите на големиот Конески и ќе кажам ‘Се додека го чуваме, го негуваме, го вардиме, го гледаме јазикот наш македонски, ќе можеме да сметаме дека ја имаме и татковината. Како куќа, како дом, како огниште”. И ова старо училиште во Љубојно, вековно огниште на употребата на македонскиот јазик, второ училиште во државава, каде по Втората светска војна започнува настава на македонски јазик, ја потврдува констатацијата на нашиот јазичен визионер Блаже Конески, но и вербата на Кочо Рацин, Славко Јаневски, Ацо Шопов и низа други автори – дека активната употреба на македонскиот јазик е неговата најголема промоција”, кажа при посетата премиерот Ковачевски. Според него со грижата за објектот се испраќа пораката дека Владата се определи за заштита и афирмација на македонскиот јазик дома и во светот.

Министерката пак, истакна: „Владата, Министерството за култура и Завод и музеј Битола презедоа обврска – објектот кој денес има имотен лист 55, да заживее во чест на македонските дејци и во спомен на сите просветни работници. Да стане собиралиште на лингвистите, педагозите, наставниците и професорите по македонски јазик и да остане како паметник за генерациите по нас дека темелите на ова здание се всушност историски темели на образованието на мајчин, македонски јазик, столбот на нашиот идентитет“. Таа, исто така, посочи дека за нас Македонците, особено оние од Преспа, урнатините од старото училиште се темелите на нашето образование на мајчин, на македонски јазик. „Овие ѕидови, подигнати од рацете на нашите мајстори пред 116 години, издржале и војни и земјотреси и пожари и невремиња и пак се тука, како сведоштво за нашата градителска укост и потсетник за нашиот пркос, за кој денес се оддолжуваме и оддаваме почит“.

Информацијата за изработка на Проект за реконструкција и ревитализација на старото училиште „Димитар Влахов” во село Љубојно беше усвоена на 119. редовна седница на Владата.

Инаку, старото училиште е во режим на заштита од 2020 година како дел од споменичната целина Љубојно. Ова училиште на 15 ноември 1944 заѕвони за првиот час, за почеток на наставата на мајчин, македонски јазик и важи за училиште кое и неколку години потоа беше светилник за сите ученици од овој Преспански регион.

Премиерот Ковачевски, заедно со министерката Костадиновска-Стојчевска вчера го посетија и ресенското село Курбиново и манастирската црква „Св. Ѓорѓи“, позната по најстарото сочувано ѕидно сликарство и византиската уметност од крајот на 12 век (1191 година). Таа е позната особено по оригинални фрески меѓу кои и фреската на Ангелот Гаврил од Курбиново (како дел од композицијата Благовештение), која е отпечатена и на банкнотата од 50 денари.

„Во манастирската црква „Св. Ѓорѓи“ се реализирани неколку проекти за заштита и конзервација со што активно се работи на зачувување на ова огромно наше културно богатство. Црквата „Св. Ѓорѓи“ во Курбиново е веќе впишана на тентативната листа на УНЕСКО, што е прв чекор во процесот на впишувањето на едно добро на Листата на УНЕСКО на светско наследство “, рече Ковачевски.

Изработката на досието за впишување на оваа листа беше извршено од страна на Заводот за заштита на спомениците на културата и Музеј–Битола.

Инаку, минатата година стручниот тим од Европскиот центар за византиски и поствизантиски споменици (ЕЦВПС) од Солун, спроведе истражување во црквата „Св. Ѓорѓи” во Курбиново, со цел да се изработи студија за одржување на фреските. Тогаш е објавено дека се очекува студијата да биде завршена до јули годинава, по што ќе биде доставена на одобрување до надлежните на македонското Министерство за култура. (Д.Т.)