„Јуниверзал мјузик“ ќе го менаџира музичкиот каталог на Елвис Присли

„Јуниверзал мјузик“ го додава каталогот со песни на кралот на рокенролот, Елвис Присли, вклучувајќи ги хитовите, како Can’t Help Falling in Love и Jailhouse Rock, во рамките на издавачкиот договор со „Аутентик брендс груп“. Финансиските услови на договорот не се откриени иако Universal Music Publishing Group во вторникот соопшти дека ќе има приходи кога песните на Елвис ќе почнат да се користат во медиуми, филмови или на телевизија. Договорот доаѓа пред јунската премиера на биографскиот филм „Елвис“ на режисерот Баз Лурман, со Том Хенкс и Остин Батлер во главните улоги. Правата на каталогот со песни на Елвис моментно се во сопственост на Authentic Brands Group, чие портфолио вклучува познати брендови, како Мерилин Монро и Мухамед Али. Надалеку познат како најпродаваниот соло музички уметник на сите времиња, Присли има продадено повеќе од 500 милиони плочи и е посебен по тоа што повеќето негови песни стигнаа во топ-40 на „Билборд“. Во 1973 година Елвис влезе во историјата на телевизијата и забавата со концертот „Елвис: Алоха од Хаваи“ глобално прикажан преку сателит. Tоа беше прв директен сателитски пренос на концерт во целиот свет.