Јовиќ му одржа кошаркарска лекција на Јанис, Гркот заврши на земја

14.02.2024 Februari Sreda

Никола Јовиќ ја дочека својата ѕвездена ноќ во НБА лигата и ја одигра најдобрата партија во својата кариера, бидејќи 20-годишниот Србин блескаше во секоја смисла на зборот на утринскиот меч против Милвоки.

Мајами одигра перфектен меч на тимски план и неочекувано лесно ги декласираше „елените“ на нивни терен со 97:123, а интересно најобар играч на паркетот беше Јовиќ.

Никола обично не е во прв план кај тренерот Сполстра и имаше одиграно само две минути на последните седум натпревари, но против Милвоки доби 30 и покажа за што е способен.

Јовиќ беше импресивен во двата правци и му помагаше на тимот на различен можен начин, бидејќи покрај тоа што беше најефикасен на паркетот со 24 поени, одигра и извонредна одбрана против Јанис.

Србинот дефинитивно ја доби битката со Гркот и еднаш ѕвездата на Милвоки заврши и на земја, но Јовиќ воодушеви со начинот на кој се бранеше од нападите на популарниот „Грик Фрик“.

– Не е лесно да се игра против Јанис, тој со причина беше двократен МВП играч во НБА лигата. Дадов се од себе, но не бев сам. Соиграчите ми го чуваа грбот и некако успеавме да го анулираме. Не може да го чувате „еден на еден“, потребно е целиот тим да биде вклучен и дефинитивно добив помош да се справам со него. Мислам дека пројдовме многу добро, – изјави Јовиќ по победата.