Ѓорческа без проблеми до осминафиналето на силниот турнир во Португалија тенис

23.07.2024 juli Vtornik

Лина Ѓорческа имаше сигурен настап во првата рунда на силниот турнир во Фигуера да Фоз во Португалија и веќе може да се подготвува за многу посериозен предизвик во осминафиналето.

Македонската тенисерка денеска требаше да игра против Американката МекКензи, но таа се повлече, а нејзиното место го зазема перуанската ривалка Анастасија Ламачкин.

Сепак, Ѓорческа ја оправда фаворитската улога и во два сета го реши мечот, во кој сепак имаше повеќе проблеми во вториот сет.

Лина дозволи брејк уште во првиот гејм, но потоа возврати со три освоени сервиси на противничката и сигурни 6:2, за во втората етапа наизменично тенисерките да покажуваат несигурност на свој сервис, но Ѓорческа успеа да го добие десеттиот гејм со брејк и да го комплетира мечот со 6:2/6:4.

Македонката во осминафиналето ќе игра против петтата носителка на турнирот, а тоа е Холанѓанката Ариан Хартоно, која денеска исто така го доби својот меч во два сета.

Турнирот во Португалија се игра на тврда подлога и за награден фонд од 100.000 долари.