Ѓоргиев по четврти пат е светски првак во кикбокс

22.10.2021 Oktomvri Petok

Најдобриот македонски кикбоксер Димитар Ѓоргиев (категорија до 81 кг), постигна огромен успех освојувајќи златен медал на Светското првенство (СП) во Џесоло Лидо, Италија (15-24 октомври), во дисциплината лоу-кик, што е негово четврто злато од СП.

Ѓоргиев до својот четврто златно одличје стигна откако ги совлада Италијанецот Давид Дано, Србинот Милош Даковиќ, во полуфиналето Бугаринот Никола Николов, а во денешното финале славеше против Никола Дробњак од Бих, сите со по 3-0.

Ѓоргиев е носител на злато на СП во 2011, 2013, 2015 (дисциплина кик-лајт) и во 2021 година (лоу кик), а во 2019 година освои бронза со што уште еднаш ја покажа својата висока класа во овој спорт. Ѓоргиев исто така има и три медали од ЕП, сребро во 2012, бронза во 2016 и злато во 2018 година.

Македонија на СП настапи со вкупно осум кикбоксери во дисциплините лоу кик, кик лајт и К1, во конкуренција на 1.418 кикбоксери од 69 држави. Г.И.