Ѓоковиќ смисли нов начин за делење автограми и стана вирален хит во Кина (Видео)
Новак Ѓоковиќ имаше мал инцидент со еден фан додека делеше автограми во подготовката за турнирот во Пекинг, а откако Србинот ја одржа стопроцентноста и запиша 30-та победа на 30-от меч во овој кинески град, се појави на теренот со оригинална алатка.
Шесткратниот шампион на Кина Опен одвои дел од своето драгоцено време за фановите и по тешката победа која ја оствари во првото коло, но најмногу внимание привлече со новитетот кој го промовираше.
Ѓоковиќ извади печат од својата торба и почна да дели автограми на тој начин, па ова уникатно видео од Пекинг брзо стана вирално на социјалните мрежи.
Ноле беше расположен по крајот на мечот и покрај тоа што преживеа вистинска голгота на теренот, бидејќи победата од 2:0 во сетови ја оствари после проблеми со дишење, губење на енергија и чести нагони за повраќање.
Ѓоковиќ успеа да го преброди сето ова и го победи Нуно Боржес со 6:3 и 7:6, па сега во второто коло ќе игра со домашниот миленик, Кинезот Јунчаокете Бу.







Comments