Чави посебно воодушевен од една акција: Ова е вистинската Барса, се возбудив!

Барселона го освои „Бенито Виламарин“ и оствари заслужен триумф на гостувањето кај Бетис, но двата постигнати гола на Рафиња и Левандовски не предизвикаа сатисфакција како една дефанзивна реакција на тимот.

Чави Ернандес посебно ја потенцираше дефанзивната транзиција која ја имаше неговиот тим во една контра на гостите во последната третина од натпреварот, кога речиси сите офанзивни играчи се вратија да помогнат во одбрана.

Оваа пожртвуваност и тимска определба на фудбалерите навистина го воодушеви Чави, кој не штедел комплименти на прес-конференцијата.

– Кога ја видов таа дефанзивна транзиција, се возбудив. Ова е вистинската Барселона, момците изведоа неверојатна акција, – порачал Чави, јасно нагласувајќи го интензитетот на неговите фудбалери во споменатата акција.

Со вчерашниот триумф од 1:2, Барса отиде на плус осум од Реал Мадрид, кој вечерва го игра својот заостанат меч против Валенсија.