„Цветиновата награда за мир“ доделена на здружението „Антево перо“

„Цветинова награда за мир“ синоќа беше доделена на здружението за зачувување на делото на Анте Поповски, „Антево перо“, во знак на благодарност и почит за исклучителна поддршка на современиот македонски поет, академик Анте Поповски кон долгогодишната мисија „Цвеќе на мирот“ на уметникот и хуманист Живко Поповски – Цветин.

Фото: Здружение „Антево перо“

Анте Поповски таа поддршка ја покажал посветувајќи три свои песни во ракопис (на македонските пазари, Љубов и Смил) и есеј „Цвеќето молитва и бесконечен хиероглиф“, објавени во две книги. Токму тоа беше голем мотив за Цветин, за неговата мисија да продолжи до денешен ден, а и понатаму.

Фото: Здружение „Антево перо“

Цветин се осврна и на срдечните средби и настани поврзани со Поповски на „Струшките вечери на поезијата“ во Струга, во Скопје и во Лазарополе. Цветин е учесник и поддржувач на шесте изданија на здружението „Антево перо“ и е член на академијата „Анте Поповски“.

Фото: Здружение „Антево перо“

Синоќа во Културно информативниот центар во Скопје беше одржан Омаж по повод 20-годишнината од упокојувањето на современиот македонски поет, академик Анте Поповски. За делото и творештвото на Анте Поповски, пред присутните беседеше проф. д-р Венко Андоновски, дописен член на МАНУ.