Христо Петрески: Да запре делењето на членството за да не се распадне ДПМ

„Секојдневно ми се јавуваат бројни членови кои изјавуваат дека во вакви тензични услови немаат намера ни да присуствуваат ни да гласаат на претстојното вонредно Изборно собрание. Не смее да се дозволи понатамошен антагонизам, на цепење и делење на членството, поради што некои членови и не се кандидираат за раководните функции. Ако вака се продолжи – не сакам да верувам во најлошото сценарио, а тоа е распаѓање на постоечкото Друштво и негово повторно конституирање. Во Статутот има предвидено и таква клаузула – поранешните претседатели да реагираат во таков случај и да не дозволат тоа да се случи“, вели во обраќањето до јавноста Христо Петрески, актуелен претседател на ДПМ во оставка

Ниту јас сакав да бидам избран на недемократски начин, ниту Стојменска-Елзесер и сите други членови на Претседателството сакаа да има каква било дамка при изборниот процес. Така треба да биде и годинава, бидејќи минатата година Изборното собрание траеше малку подолго, но се одвиваше на најдемократски и најтранспарентен начин, вели во обраќањето испратено денес до јавноста Христо Петрески, актуелен претседател на ДПМ во оставка.

Како што посочува тој, Новиот Деловник за работа на Изборното собрание на ДПМ бил донесен во мај 2022 година и првпат била воведена жрепка и јавно броење на гласовите. „Тоа беше моја идеја како тогашен претседател на Собранието на ДПМ, а за што се залагаше и тогашната претседателка на ДПМ Соња Стојменска – Елзесер, но тоа го прифатија и одобрија сите други членови на Претседателството на ДПМ“, истакнува Петрески.

Како што информира понатаму, минатата година, тој, како претседател на Собранието благовремено го доставил и објавил Дневниот ред за Изборното собрание и од неговото објавување поминале предвидените 45 дена според Статутот. „Така треба да биде и годинава за да бидат информирани сите членови на ДПМ и да има време да се поднесат и разгледаат сите кандидатури и добро да се подготви вонредното Изборно собрание“, вели тој.

Петрески информира и дека средства за патни трошоци на сметката на ДПМ има.

„Сите членови од внатрешноста на Републиката, кои ќе присуствуваат на вонредното Изборно собрание, ќе ги добијат тие средства на своите сметки веднаш по завршувањето на Собранието. Лично и јас и техничките секретари во изминатиот период се трудевме да имаме точни мејлови, телефонски броеви и адреси од членовите на ДПМ, но за жал до денес тој список не е конечен и дефинитивен, исто како и списокот на членови на ДПМ, каде што имаше голем број починати членови, па дури и еден непримен, а запишан член. Затоа, ги молам сите членови на ДПМ внимателно да го разгледаат списокот на членовите на ДПМ (објавен е на страницата www.dpm-pisateli.mk) и да укажат на сите пропусти во него. Списокот на членовите е најбитниот и за самиот изборен процес, зашто мора да гласаат најмалку третина членови според тој Список – за Изборното собрание да биде легитимно“, додава тој.

За да изборниот процес на претседател и претседател на Собранието биде законски валиден, легален, демократски и транспарентен, Петрески повикува членовите на ДПМ, кои се правници, да се изјаснат кога точно треба да се одржи вонредното Изборно собрание, поради 45. дена предвидени во Статутот од денот на закажувањето на Собранието.

Тој воедно посочува дека во иднина треба да се донесе и нов Статут, каде што јасно ќе се прецизира прашањето како да се постапува при евентуален случај на оставки во Претседателството, како што беше случајот неодамна, бидејќи мандатот на раководствата (кој порано беше две со можност за уште две години), сега е четири години со можност за уште четири години. Како што истакнува, според него тоа е предолг период.

„Иако поднесов оставка, како сè уште актуелен претседател на Друштвото на писателите на Македонија, сакам да Ве замолам за повеќе трпение, почит и достоинство кон Друштвото и кон сите негови членови. Се согласувам со барањата и укажувањата на Ивица Челиковиќ, Венко Андоновски, Зоран Пејковски, Мишел Павловски. Вчера, техничката секретарка Лидија Размоска-Тримовска се откажа од своето работно место во ДПМ поради притисоци. Јас сум во секојдневен контакт со претседателката на Собранието, Кристина Николовска и помагам колку што знам и можам и се надевам дека барем таа ќе издржи до вонредното Изборно собрание. Во ДПМ има бројни проблеми, а најголемиот е што Друштвото сè уште, по 76 години постоење, нема имотен лист за просториите кои ги користи. Јас лично ја започнав таа процедура и речиси стигнав до самиот крај, но поради оставките на членовите на Претседателството и самиот дадов оставка. Апелирам да престанат јавните и заткулисни притисоци, закани и уцени, поради кои и самиот поднесов оставка, зашто не се работи под притисоци, закани и уцени“, вели Христо Петрески.

Воедно, тој посочува и дека во минатото се примале некои членови усно, без запазување на процедурата и знаење на Претседателството, па во списокот на членови имало и такви кои воопшто не биле примени.

„Но, тоа е минато и не може и не треба да се прави ревизија на членството. До мене како прв човек на ДПМ стигнуваа повеќе барања и тоа од највидни членови на Друштвото да се направи ревизија на членството, но јас тоа категорички го одбивав, зашто сите членови се рамноправни и не прифаќам никакви поделби на писатели и неписатели, млади и стари, писатели со титули и без титули, од Скопје и внатрешноста. Секојдневно ми се јавуваат бројни членови кои изјавуваат дека во вакви тензични услови немаат намера ни да присуствуваат ни да гласаат на претстојното вонредно Изборно собрание. Не смее да се дозволи понатамошен антагонизам, цепење и делење на членството, поради што некои членови и не се кандидираат за раководните функции. Ако вака се продолжи – не сакам да верувам во најлошото сценарио, а тоа е распаѓање на постоечкото Друштво и негово повторно конституирање. Во Статутот има предвидено и таква клаузула – поранешните претседатели да реагираат во таков случај и да не дозволат тоа да се случи. А, сега апелирам за толеранција, разумност и смиреност за да се запазат сите законски рокови и процедури“, го завршува своето обраќање актуелниот претседател на ДПМ во оставка.