Хрватите добија нов ракометен селектор, без функција остана и Червар

Ракометната репрезентација на Хрватска од денеска има нов селектор, што е потврда за отказот за досегашниот предводник Хрвоје Хорват.

Негов наследник ќе биде поранешниот ракометар Горан Перковац, кој доби сериозна поддршка од хрватската јавност и ќе се обиде да ја врати репрезентацијата во друштвото на најдобрите во светот.

Хорват не го положи испитот затоа што Хрватска не избори ни четвртфинале на последното Светско првенство, а резултатскиот неуспех го заокружи со контроверзно однесување за време на последното интервју од мундијалот.

Координаторот на машките репрезентации во Хрватската федерација, Лино Червар, предложил смена на Хорват и именување на Перковац, а Управниот одбор ги прифатил сугестиите.

За да биде поинтересно, Червар исто така остана без својата функција, бидејќи таа е укината со денешната одлука на ХРС.