Херојот од Палермо со моќна најава: Трајковски испрати порака пред финалето на „Драгао“ (Фото)

29.03.2022 Mart Vtornik

Александар Трајковски беше херој на натпреварот во Палермо и донесе победа за македонската фудбалска репрезентација, но очекувањата се и вечерва да биде еден од клучните во играта на Благоја Милевски.

Иако Македонија влегува во Порто како аутсајдер, сите наши репрезентативци и комплетниот стручен штаб веруваат во голема победа над моќната Португалија, која се надеваме дека ќе ја снајде иста судбина како Италија.

Трајковски минатиот четврток со спектакуларен удар од далечина го совлада Донарума и ја одведе Македонија на 90 или 120 минути од испишување на нова историја, а пред натпреварот на „Драгао“, со инспиративна порака се јави популарниот Алекс.

– Денеска играме за нас, за нашите семејства, за цела Македонија, за да испишеме историја, – порача Трајковски на социјалните мрежи.

Натпреварот меѓу Португалија и Македонија претставува бараж финале за пласман на мундијалот, а истиот ќе започне во 20:45 часот и ќе има директен пренос на првиот канал на „Спортклуб“.