Фуриозниот Циципас со спектакуларна игра до трето полуфинале во Австралија

Стефанос Циципас се измачи во пет сета против Тејлор Фриц во осминафиналето на Австралија Опен, но затоа денеска немаше никакви проблеми и фуриозно се пласираше меѓу четирите најдобри.

Јаник Синер беше најнеискусниот тенисер останат во ждребот на првиот грен слем турнир во годината, па на Италијанецот брзо му стана јасно дека денеска нема што да бара на теренот против расположениот Грк кој погодуваше винери со сите оружја.

Циципас славеше брзо и експресно со 6:3, 6:4 и 6:2, а тоа што се задржа на теренот помалку од два часа е добра вест за наредниот меч на кој ќе има далеку посериозен тест.

Гркот по трет пат во својата кариера ќе игра полуфинале на Австралија Опен, бидејќи претходно тоа го направи минатата година кога загуби од Медведев, но и во 2019-та кога беше декласиран од Рафаел Надал.

Во третото полуфинале во Мелбурн, противник ќе му биде подобриот од последното четвртфинале во кое силите ќе ги одмерат Данил Медведев и Оже Алијасим.