Французинот Муте со „пируета сервис“ стана тениска сензација на Твитер

30.09.2021 Septemvri Cetvrtok

Корентан Муте е дел од новата тениска генерација која допрва треба да се докажува на највисоко ниво, но 91-от тенисер на АТП листата сега го привлече вниманието со потегот кој го изведе на турнирот во родната земја.

Муте оствари втора победа на турнирот во Орлеанс откако го совлада Сафиулин со 2:1 во сетови, но цела тениска јавност зборува за лудиот и невиден сервис кој се обиде да го проследи во противничкото поле.

Во моментите кога беше јасно дека ќе го загуби вториот сет и дека Русинот ќе израмни на 1:1, Муте се одлучи за некарактеристичен пируета сервис кој досега не е виден на тениските терени, па видеото експресно стана вирално на социјалните мрежи.

Движењата на Французинот предизвикаа бура од реакции од тениските фанови, па без оглед на тоа што обидот беше неуспешен, техниката која ја понуди направи да стане топ тема за неколку часа во тениската јавност.