фото и видео Влатко Стефановски му го подари албумот „London Sessions“ на кралот Чарлс во Лондон

22.10.2025 Oktomvri Sreda

Еден од најпочитуваните гитаристи во овој регион, Влатко Стефановски, имаше чест да се сретне со кралот Чарлс III во Лондон , на кого му го подари својот тековен албум „London Sessions“, издаден од „Croatia Records“. Ова го направи единствениот музичар од регионот кој имал лична средба со британскиот монарх. Стефановски со културна делегација од Македонија, беше на приемот во палатата „Сент Џејмс“, во рамките на самитот на Берлинскиот процес. На самитот во Лондон е и премиерот Мицкоски со неколку министри.

Албумот „London Sessions“, издаден на ЦД и тројно ЛП издание од „Croatia Records“, беше снимен во легендарното „Abbey Road Studio 3“ во Лондон. На албумот се појавуваат Стефановски, заедно со неговиот син Јан Стефановски на тапани и Тихомир Хојсак на електричен контрабас. Снимањето и продукцијата ги водеше Горан Мартинац, со помош од Ед Фарел и Лија Морис, додека Шон Меги, добитник на Греми за „Mono Box Set“ на Битлси, го направи последниот лакиран рез.

„Музиката на Влатко Стефановски, снимена на легендарната „Abbey Road“, сега ќе одекнува и во кралските комори. Горди сме што нашиот уметник имаше можност да му ја претстави својата работа и музиката од нашиот регион на британскиот крал“, објави „Кроација рекордс“ од Загреб, најголемата издавачка куќа во регионот. (Л.С.)