фото и видео MTV затвора пет музички канали: Крај за омилените MTV Music, MTV 80s и MTV 90s по 40 години емитување

14.10.2025 Oktomvri Vtornik

По речиси четири децении емитување, MTV ќе престане да емитува поп и музички програми во Велика Британија. Според извештајот на BBC, пет музички канали на MTV – MTV Music, MTV 80s, MTV 90s, Club MTV и MTV Live – ќе бидат затворени по 31 декември 2025 година.

Сепак, главниот канал MTV HD ќе продолжи со емитување, но ќе се фокусира исклучиво на реалити програми, меѓу кои и популарните Naked Dating UK и Geordie Shore.

Одлуката, како што соопшти британскиот јавен сервис, го одразува радикалниот пресврт во начинот на кој публиката денес консумира музика и видео-содржини. Денес најголем дел од гледачите музичките видеа ги следат преку YouTube, TikTok и социјалните мрежи, а не на класичните телевизиски канали.

Портпаролот на Paramount, матичната компанија на MTV, одби да ги коментира информациите, но според медиумските извештаи, компанијата планира да ги затвори музичките канали на MTV и во други земји, меѓу кои Австралија, Полска, Франција и Бразил.

Овој потег е дел од глобална стратегија за намалување на трошоците за 500 милиони долари, која опфаќа реорганизација на сите медиумски брендови во сопственост на Paramount.

MTV беше лансиран во САД во 1981 година, а европскиот огранок започна со работа во 1987 година. Со емитување 24 часа на ден, MTV го промени начинот на кој се доживуваше музиката – создавајќи нова генерација поп-ѕвезди и претворајќи ги музичките видеа во глобален феномен.

Со овој потег, една од највлијателните музички телевизии во историјата ја завршува својата оригинална мисија – да биде дом на музиката.

Текстот го подготви: Влад Петров