Филмски фестивал „Богородичен Покров“: Документарен филм „Заштитник-Свети Нектариј Битолски“

17.12.2021 Dekemvri Petok

По повод празникот на „Свети Нектариј Битолски“, вечерва во 21 часот, се прикажува филмот од фестивалската архива на „Богородичен Покров“.

Прв документарен филм за животот и делото на Свети Нектариј Битолски, кој раскажува за местото каде што тој се родил, скитот во кој што се подвизувал и за возобнувањето на неговиот култ во Битола.

Реализиран е со благослов на Неговото Високопреосвештенство, Митрополитот Преспанско-пелагониски г.Петар.

Филмот го прикажува животниот пат на македонскиот светител од 15-ти век преподобниот Нектариј, кој уште како дете заминал од Битола и своето светителско достоинство го добил далеку од своето родно место, на Света Гора. Проектот бил поддржан од општина Битола.

Филмот е во режија на Благојче Божиновски, сценариото на Драги Атанасовски, во продукција на АСТРА – ВЕДА Македонија.

Во вишеградскиот дел од програмата на шестиот меѓународен филмски фестивал за културно, духовно, историско наследство и духовни вредности – „Богородичен Покров“, што се одржува онлајн од 11 до 26-ти месецов во Скопје, може да се погледнат играни и документарни филмови од Чешка, Словачка, Унгарија, Србија и Македонија.

Годинава фестивалот е спонзориран од Вишеградскиот фонд. Проектот е кофинансиран од владите на Чешка, Унгарија, Полска и Словачка преку вишеградски грантови од меѓународниот Вишеградски фонд. Мисијата на фондот е да ги унапреди идеите за одржлива регионална соработка во Централна Европа.

Во програмата на фестивалот се прикажуваат документарни и играни филмови посветени на културното, духовно наследство и хуманоста, како и историски и биографски филмови. Вкупно ќе бидат прикажани 20 филмови и ТВ програми од Македонија, Русија, Србија, Чешка и Словачка, Унгарија, Романија и Франција. Сите се преведени на македонски јазик, поголем број и на англиски, а дел од програмата е и на српски јазик. Филмските проекции се бесплатни.