Филмаџиите ќе протестираат ако им се скрати буџетот, министерката демантира

„Министерството за култура не пристапило кон никакво кратење на буџетот на Агенцијата за филм. Во моментов во собраниска процедура е донесување на одлука за прераспределба на средства помеѓу буџетските корисници и фондовите. По нејзино усвојување, до крајот на буџетската година ќе се преземат сите активности за исплата на обврските согласно склучените договори, меѓу кои и кон Агенцијата за филм“, велат од ресорното Министерство. Филмаџиите пак, посочуваат дека кратењето на средства и ненавремена исплата, ќе ја доведе во прашање егзистенцијата на сите учесници во процесите на реализација на филмските проекти

Македонските филмаџии (режисери и продуценти) најавуваат протести доколку се реализира наводниот предлог на Министерството за култура за кратење на буџетот за филмската дејност. Од ресорното министерство, пак, вчера експресно демантираа дека ќе има какво било кратење, посочувајќи дека се работи за шпекулација.

„Министерството за култура ќе ги исплати сите обврски кон македонскиот филм до крајот на годината. Во врска со информациите по испратеното писмо од група филмски работници до Министерството за култура преку кое тие, според нив, искажуваат своја реакција од кратењето на предвидениот годишен буџет за филмска дејност, како што велат ‘без претходна најава и без консултации од Агенцијата за филм’, информираме дека Министерството за култура не пристапило кон никакво кратење на буџетот во културата, а уште помалку на буџетот на Агенцијата за филм. Во моментов во собраниска процедура е донесување на одлука за прераспределба на средства помеѓу буџетските корисници и фондовите. По нејзино усвојување, Министерството за култура до крајот на буџетската година ќе ги преземе сите активности за исплата на обврските согласно склучените договори, меѓу кои и кон Агенцијата за филм“, велат од ресорното министерство. Оттаму апелираат филмските работници да не потпаѓаат на шпекулации, на непроверени информации, невистини, манипулации и гласини.

Филмаџиите, меѓу другото во своето писмо посочија и дека од неофицијални информации, дознале дека Министерството немало да дозволи ниту користење на пари од сметката на Агенцијата за филм на која се акумулираат средства од различни извори.

„Доколку овие информации се точни и истите бидат изгласани во Собранието на РСМ, ќе дојде до целосно блокирање на филмската дејност, бидејќи наведените средства се планирани за проекти од национален интерес кои се во тек на реализација. На овој начин се нанесува штета на и онака кревката филмска индустрија во Македонија и се доведува во прашање егзистенцијата на филмските автори, продуценти, филмски работници, актери и сите останати учесници во процесите на реализација на филмските проекти. Блокирањето на овие филмови доведува до голема штета врз македонската кинематографија и на интернационално ниво, бидејќи во проектите учествуваат меѓународни продукции кои се финансирани од национални европски фондови и Еуримаж – најголемиот фонд за европски копродукции формиран во рамките на Советот на Европа“, посочуваат филмаџиите во отвореното писмо кое го потпишуваат над 70 македонски режисери и продуценти. Тие додаваат дека доколку не биде повлечен ваков предлог, револтот ќе го изразат со протести и со повлекување на нивните филмови и ТВ серии од кината, платформите и телевизиите во Македонија…

По одговорот од Министерството, пак, истакнуваат дека со овој обид за демант и официјално се потврдија нивните информации дека е предвидено кратење на средства од буџетот за филмска дејност на Агенцијата за филм.

„Министерството изјавува дека наводно за финансиските средства кои сега ќе ги земе од Агенцијата за филм ќе преземе активности да ги врати до крајот на годината. Затоа уште еднаш нагласуваме дека средствата предвидени во буџетот за 2023 година ни се потребни веднаш и сега, а не во декември, уште помалку следната година“, велат филмаџиите. (Д.Т.)

Агенција за филм: Потребен е стандардизиран буџет за кинематографијата

Од Агенцијата за филм посочуваат дека како и секоја друга институција во државата ги планираат средствата за дејноста со која се занимаваат и ги подготвуваат за исплата проектите кои чекаат да почнат со продукција.

„Во моментов најавени се два филма за снимање на локации во Македонија. Интернационалните екипи на земјите учесници кои се дел од овие проекти се веќе пристигнати во нашата држава. Финансиските средства кои се планирани за овие и останатите филмски проекти се потребни веднаш и не може да чекаат прераспределба на средствата помеѓу буџетските корисници и преземање на активности од страна на Министерството за култура до крајот на годината за исплата на договорените проекти“, велат од Агенцијата за филм.

За ова да се спречи, Агенцијата за филм предлага да се разгледаат и ревидираат одлуките за прераспределба на средствата од причина што во спротивно штетата би била од огромни размери за македонската кинематографија. Тие предлагаат да се изнајде трајно решение за да се спречи трендот на намалување на буџетот за филмска дејност и да се изнајде решение за стандардизиран буџет за македонската кинематографија.

По оваа информација, од Министерството вчера повторија дека кратење на буџетот за филм ќе нема. “Со оглед на соопштението на Агенцијата за филм, информираме дека, сите обврски кои Агенцијата ги има преземено кон своите корисници, ќе бидат навремено сервисирани, согласно динамиката и месечните планови“, додадоа од Министерството.