Фестивалот „Панфиз“ по 14. пат и со ексклузивна македонска премиера

Четиринаесеттото издание на „Панфиз и годинава ќе се одржи на отворено и тоа на платото на Македонскиот народен театар, на северозападната тераса, од 30 јуни до 2 јули. Местата ќе бидат ограничени (30), во корелација со просторот, а по препорака на Комисијата за здравство.

„Оваа година имаме ексклузивна македонска фестивалска премиера и тоа во режија и кореографија на Ирена Лозинска – претставата се вика „Четири“ и е сублимат на физички театар, буто, танц и пантомима (30 јуни, 20:45 ч). „Алисин Вондербанд“ од Србија и оваа година е на „Панфиз“, но овојпат со целодневна работилница наречена „Телото како инструмент“, која ќе биде вистинско освежување за млади таленти, но и постари актери заинтересирани за перкусионистички елементи, пеење, ритмика и актерска игра (1 јули, 10-14 ч). Од Бугарија ни доаѓа Александар Илиев, со претставата „Комедија дел’ арте“ (1 јули, 20:30 ч), а ќе видиме и два буто перформанси, во продукција и изведба на НектанАрт Центар, Марко Стојановиќ од Србија, а тоа се претставите „Светиот Маченик“ (1 јули, 20:30 ч) и „Спајдердаст“ (2 јули, 20:30 ч). Идејата е да не застанеме и да не ја прекинеме традицијата“, велат од „Панфиз“.

Во случај на невреме претставите ќе се играат на малата сцена на МНТ. Билетите ќе бидат поделени пред претставата по принципот прв дојден прв услужен.