Унахи дебитираше во Марсеј со фудбалска брилијантност, Тудор се фаќаше за глава

Азедин Унахи беше вистинско откровение на Светското првенство во Катар и сериозно го сврте интересот на себе од страна на многу поважни клубови од Анже, па така на крајот од зимскиот преоден рок направи трансфер во Марсеј.

Клубот од „Велодром“ заврши импресивна работа и за само 10 милиони евра го донесе еден од најталентираните играчи во Лига 1, кој пак вчера дебитираше на незаборавен начин.

Марсеј победи на гостувањето кај Нант со резултат 0:2, а голот во 92-та минута беше дело токму на Унахи. Мароканецот доби 15-тина минути од Игор Тудор на дебито, но Хрватот воопшто не зажали што му даде шанса по само неколку тренинзи.

Унахи режираше фудбалска минијатура за потврда на победата и постигна гол при кој демонстрираше завидна магија, на која не остана рамнодушен ниту Тудор.

Хрватот се држеше за глава, а потоа му го прекинал и интервјуто на Унахи со зборовите: Тоа што го направи беше неверојатно.