Триумф за „Опенхајмер“ со седум статуетки, „Барби“ само со една

Доделени „оскарите“

12.03.2024 Mart Vtornik

„Опенхајмер“ е најдоброто остварување на 96-то доделување на „оскарите“. Од 13 номинации, приказната за креаторот на атомската бомба освои седум златни статуетки, меѓу кои се наградите за режија на Кристофер Нолан и за најдобар актер за Килијан Марфи. „Кутрите“ освои четири статуетки, а Ема Стоун го освои својот втор „оскар“ за најдобра актерка. Реализацијата на „Убијци на цветната месечина“ на Мартин Скорсезе, и покрај десетте номинации, не освои ниту една награда, додека „Барби“ доби само еден „оскар“ – за најдобра песна. Килијан Марфи, кој го играше физичарот Џ. Роберт Опенхајмер, на церемонијата во театарот „Долби“ во Холивуд, Лос Анџелес, рече дека е презадоволен што победил.– Снимавме филм за човекот што ја создаде атомската бомба. Сите живееме во светот на Опенхајмер, па би сакал да им ја посветам оваа награда на сите миротворци – рече Марфи, кој е првиот актер роден во Ирска што добил „оскар“ во категоријата за најдобар актер.На Роберт Дауни Џуниор му беше врачена наградата за најдобра споредна машка улога за улогата на американскиот владин функционер Луис Штраус во „Опенхајмер“. Режисерот Кристофер Нолан, кој конечно го освои својот прв „оскар“, рече дека „филмовите се стари малку повеќе од сто години и не знаеме каде оди ова неверојатно патување“, но тоа го смета за значаен дел од него, многу му значи.„Опенхајмер“ освои и награди за најдобра монтажа, оригинална партитура и кинематографија. Сепак, загуби во неколку други технички категории, што му го ускрати рекордот на победи. „Кутрите“ пак ги доби златните статуетки за најдобра сценографија, костимографија, шминка и фризура, како и за најдобра актерка – Ема Стоун. Филмот на Јоргос Лантимос е приказна за новороденче чиј мозок е вграден во телото на возрасна жена, која потоа тргнува во авантура за да го открие светот.– Голема чест ми е што можам да го споделам ова со секој член на актерската екипа, секој член на екипата, секоја личност што внесе љубов и брилијантност во снимањето на овој филм – рече Стоун.

„Барби“, филмот со најголема заработка во 2023 година, освои само една од осумте награди за кои беше номиниран – за најдобра оригинална песна, за песната „What Was I Made For“ од Били Ајлиш.„Зоната на интерес“ ја освои наградата за најдобар звук и стана првиот британски филм што освоил награда за најдобар меѓународен долгометражен филм. Драмата за холокаустот следи германско семејство што живее во близината на концентрациониот логор Аушвиц. Во својот говор режисерот Џонатан Глејзер ги критикуваше Израел и војната во Газа.– Нашиот филм покажува каде води дехуманизацијата. Таа ги обликуваше целото наше минато и сегашност. Стоиме овде како луѓе што ги негираат еврејството и холокаустот – изјави Глејзер.За најдобар документарен филм е прогласен филмот „Дваесет дена во Мариупол“. Режисерот Мстислав Чернов пред публиката изјави дека му е чест што е првиот украински добитник на „оскар“. Од друга страна, „Анатомија на падот“ ја доби наградата за најдобро оригинално сценарио. Филмот зборува за жена обвинета за убиство на нејзиниот сопруг, а единствен сведок е нејзиниот син со оштетен вид. „Американска фикција“ го освои „оскарот“ за најдобро адаптирано сценарио. Во категоријата најдобар анимиран филм победи јапонскиот анимиран филм „Момчето и чапјата“ на познатиот режисер Хајао Мијазаки.Домаќин на церемонијата по четврти пат беше Џими Кимел, кој се пошегува дека актерите можат да престанат да се грижат „дека ќе бидат заменети со вештачка интелигенција и повеќе да се грижат дали ќе бидат заменети со помлади, поатрактивни луѓе“.