Трета зимска школа на МСМЈЛК во чест на Ацо Шопов: „Македонија е судбина на светот, светот е судбина

„Самиот факт што на Зимската школа присуствуваат повеќе од 40 учесници од 17 земји од светот сведочи за интересот за изучување на македонскиот јазик на што сите треба да бидеме особено горди. Без дилеми, меѓу учесниците имаме нови афирматори на македонскиот јазик, на македонската литература и култура, но и пријатели на нашата земја и нејзините убавини. Во исто време, искажаниот интерес нè потсетува и на обврската што ја имаме да го негуваме македонскиот јазик и постојано да работиме на неговото зачувување и унапредување“, рече претседателот Стево Пендаровски во своето видеообраќање на отворањето на Третата зимска школа на Меѓународниот семинар за македонски јазик, литература и култура

– „Македонија е судбина на светот, светот е судбина на Македонија“ – овој стих на великанот Шопов се чини ја одразува смислата на оваа, Трета зимска школа. Затоа што во сето време досега, токму странските македонисти и слависти се оние кои овозможија во една убава смисла да се остварува идејата дека „светот е судбина на Македонија“ – преку нивните беспоштедни заложби македонскиот збор да се чуе и разбере во странските културни средини. Ама во исто време, преку нивната решеност да се посветат на македонистиката и таа за нив да е животна определба, и нашата татковина постана судбина на светот, затоа што заложбите на странските македонисти и слависти се остваруваат не само во рамките на универзитетските центри и на меѓународната научна сцена, туку и воопшто преку афирмација на македонскиот збор и македонската мисла ширум светот, рече денеска проф. д-р Весна Мојсова-Чепишевска на отворањето на Третата зимска школа на Меѓународниот семинар за македонски јазик, литература и култура при Универзитетот „Св. Кирил и Методиј“, на која учествуваат над 40 странски македонисти од 17 држави. Со Школата на МСМЈЛК започна чествувањето на големиот јубилеј – 100 години од раѓањето на великанот на современата македонска литература и култура, Ацо Шопов и остварувањето на националната програма во негова чест.

Своето обраќање, директорката на МСМЈЛК при УКИМ, Мојсова-Чепишевска, во целост им го посвети на странските македонисти, поврзувајќи ја нивната посветеност на македонистиката и со поезијата на Ацо Шопов. Обраќајќи им се и реферирајќи на стихови на Шопов, таа им посака преку наставата на оваа Зимска школа, тие уште повеќе да ги засакаат нашата земја и македонскиот јазик, литература и култура и ги поттикна да продолжат со посветеноста кон македонистиката.

– Ако денес, од некои други простори, Ацо Шопов може да нè види и чуе, се надевам дека ќе се залечат дел од неговите рани кои оставија лузни во неговата поезија, затоа што денес, со оваа Зимска школа, инакво, а суштинско значење добива неговиот стих: „Македонија е во светот, а светот во Македонија“. Затоа што денес, во негова чест, „по долгите патишта на светот се отсликува ликот на Македонија,/ а ликот на светот во Македонија“, рече Мојсова-Чепишевска.

На свеченото отворање на Школата, што се одржа на платформата „Зум“, се обратија и претседателот на државата, Стево Пендаровски, под чиешто покровителство се остварува националната програма „2023, Година во чест на Ацо Шопов“, како и ректорот на Универзитетот „Св. Кирил и Методиј“, проф. д-р Никола Јанкуловски.

„Самиот факт што на Зимската школа присуствуваат повеќе од 40 учесници од 17 земји од светот, сведочи за интересот за изучување на македонскиот јазик на што сите треба да бидеме особено горди. Без дилеми, меѓу учесниците имаме нови афирматори на македонскиот јазик, на македонската литература и култура, но и пријатели на нашата земја и нејзините убавини. Во исто време, искажаниот интерес нè потсетува и на обврската што ја имаме да го негуваме македонскиот јазик и постојано да работиме на неговото зачувување и унапредување“, рече претседателот Пендаровски во своето видеообраќање.

Посочувајќи на насловот на една од поетските книги на Ацо Шопов, „Ветрот носи убаво време“, Пендаровски им се обрати и на учесниците на Школата.

– Дозволете ми да ви посакам Школата да ви донесе само убаво време, убави моменти со плодни дискусии од кои ќе произлезат нови иницијативи за соработка, истражување и развој, истакна претседателот во завршницата на обраќањето.

И ректорот на УКИМ, Јанкуловски им се заблагодари на странските македонисти за нивниот интерес и посветеност за изучувањето на македонскиот јазик, литература и култура, потсетувајќи дека тие се најголеми културни амбасадори на нашата држава, а посочи и на бројноста на државите од кои има учесници на Третата зимска школа, вклучително и држави од кои претходно, повеќе години немало пријавено учество. Тој воедно им порача дека УКИМ, во рамките на своите надлежности ќе стои зад нивната решеност да ја афирмираат и развиваат странската македонистика.

– Шопов како една од централните личности на македонскиот XX век ги постави темелите на мостовите меѓу македонската и поголем број странски култури. Ние како негови потомци имаме обврска тие мостови да ги одржуваме и да ги зајакнуваме. Ама и да градиме нови! Во нашава современост, чинам нема друг субјект кој на академско ниво, дотолку се залага и придонесува за одржување и јакнење на постојните мостови и градење нови токму преку јазикот, речта и културните вредности, колку Меѓународниот семинар кој е организатор на оваа Школа, што несомнено се потврдува преку резултатите од соработката и влогот со странските македонисти и слависти – и во странските културни средини и кај нас. Оттука, и со оваа Школа, меѓу другото, на академско ниво се остварува дел од она за што Шопов и неговата генерација културни дејци се залагале на средината на минатиот век, додаде ректорот Јанкуловски.

Веднаш по отворањето, Школата, која се одржува виртуелно, на далечина, започна со интензивна работа, со учесници од: Кина, Виетнам, Соединетите Американски Држави, Австралија, Турција, Полска, Словенија, Чешката Република, Унгарија, Грција, Бугарија, Романија, Молдавија, Руската Федерација, Хрватска, Србија и Босна и Херцеговина. Планирано е да трае до 28 јануари, со вкупен фонд од по 30 часа за секоја од групите.

МСМЈЛК најави дека по Третата зимска школа, планира и други активности посветени на Шопов во текот на оваа година. Инаку, Зимската школа на МСМЈЛК за првпат се одржа во 2021 година, како прва активност во рамките на програмата за одбележување на 100-годишнината од раѓањето на Блаже Конески, а минатата година веќе се потврди дека ќе прерасне во традиција, во рамките на остварувањето на мисијата за афирмација и развивање на македонистиката на странските универзитетски центри и воопшто во странските културни средини, по што годинава, со неа започнува чествувањето на 100-годишнината од раѓањето на Ацо Шопов.