Тинејџерот Антонели победи на „Сузука“ и го презеде врвот во Формула 1!

30.03.2026 Mart Ponedelnik

Тинејџерот на Мерцедес, Кими Андреа Антонели победи на третата трка на календарот во Формула 1. Италијанецот беше најбрз на трката за Големата награда на Јапонија и со тоа го презеде врвот во поредокот пред принудната пауза од пет седмици. 

Антонели имаше катастрофален старт, иако почна од пол-позицијата. Веднаш на стартот падна дури до седмото место, па мораше да се пробива низ поредокот. Добро почнаа Оскар Пиастри и Шарл Леклер кои скокнаа пред двата болиди на Мерцедес, а на крајот завршија и на подиумот. Клучниот момент на трката се случи некаде околу дваесеттиот круг кога дел од возачите веќе променија гуми, а Оли Берман излета и предизвика безбедносно возило. Од тоа најмногу профитираше Антонели и на крајот изби на врвот и стигна до убедлива победа. 

Второто место му припадна на Пиастри кој доцнеше цели 14 секунди. Австралиецот не беше загрозен од конкуренцијата, иако Леклер заврши секунда и половина зад него. Возачот на Ферари едвај го издржа налетот на Џорџ Расел за последното место на подиумот. Зад нив следуваа уште двајца Британци, Ландо Норис и Луис Хамилтон, а во топ десет беа уште Пјер Гасли, Макс Верстапен, Лиам Лосон и Естебан Окон.

Во поредокот Антонели скокна со 72 бода на врвот, а Џорџ Расел е втор со 63. Оваа предност Италијанецот ќе ја има најмалку пет седмици, бидејќи во април се откажани двете трки на Блискиот Исток во Бахреин и Саудиска Арабија, па следната е на 3 мај во Мајами.