Тен Хаг со јасна порака по обезбедениот настап во ЛШ: Потребни ни се подобри играчи!

Манчестер Јунајтед ја оствари најважаната цел која си ја постави на стартот на сезоната и обезбеди пласман во топ четири друштвото во Премиер лигата, успех кој гарантира настап во Лигата на шампионите наредната сезона.

Тоа е многу важно за амбициите кои ги има клубот од „Олд Трафорд“, но е непроценливо и клучно и во обидот да се привлечат што е можно позвучни имиња во летниот преоден рок.

Ерик Тен Хаг ќе добие навистина висока оценка за работата во првата сезона без оглед на резултатот во ФА Куп финалето против Манчестер Сити, но самиот е свесен дека овој тим на Јунајтед не е доволно силен да се бори за титулата во Премиер лигата.

Напредокот е евидентен во изминатите 10 месеци, но Холанѓанецот потенцира дека се потребни уште подобри играчи за да се приближат до конкуренцијата, а пред се до Манчестер Сити.

– Направивме добра база која треба да се надоградува, но нашите стандарди треба да бидат повисоки и мора да продолжиме напред. Ќе имаме напорна работа претстојново лето со овој тим кој го имаме, но ќе мора да се подобриме во летниот преоден рок.

– Сакаме да се бориме за титулата, но ова е реалноста во моментов, таму сме кадешто заслужуваме. Далеку сме од врвот, но потребно е многу работа, а потребни ни се и подобри играчи за да се натпреваруваме на највисоко ниво, – изјави Тен Хаг.