Тен Хаг со емотивно писмо им се обрати на навивачите на Јунајтед по незаборавниот ден на „Вембли“ (Ф

Ерик Тен Хаг е најзаслужен за неверојатниот развој и напредок кој го бележи Манчестер Јунајтед во последните неколку месеци, период кој вчера беше заокружен со првиот трофеј во ерата на холандскиот стручњак.

Манчестер Јунајтед го победи Њукасл на „Вембли“ и ја освои титулата во Карабао Купот, што воедно значеше крај на постот без трофеј кој траеше од 2017-та година.

Иако не станува збор за трофеј од калибарот на Премиер лигата или Лигата на шампионите, овој успех донесе огромна сатисфакција во црвениот дел од Манчестер, бидејќи сите на ова гледаат како почеток на една убава ера која ќе го врати стариот сјај на клубот.

Поради тоа, Ерик Тен Хаг денеска се обрати со емотивно писмо до навивачите на Јунајтед:

– До сите навивачи на Манчестер Јунајтед…… Сакав да одвојам време да ви се обратам директно утрово. Кога пристигнав во клубот, зборувавме за предизвикот и важноста од повторно обединување на оваа група играчи со нашите неверојатни навивачи. Верувајте ми, овој тим точно знае колку сте важни. Врската помеѓу навивачите и тимот е таму за сите да ја видат и она што го доживеавме заедно вчера само дополнително ќе ја зацврсти таа врска.

– Атмосферата создадена од вас на Вембли беше неверојатна. Од првата до последната минута бевте таму со нас, водејќи го тимот, поддржувајќи го и охрабрувајќи го да ја надмине линијата и да го врати трофејот во Манчестер. За оние од вас кои не можеа да бидат таму, ја почувствувавме вашата поддршка пред, за време и по натпреварот. Треба да знаете дека секој од вас секогаш ќе ја игра својата улога во успехот на овој тим.

– Горд сум на моите играчи и персоналот за нивната подготовка и настапот. Вчера ја видовме потребната желба, дух и одлучност која мора да ја бараме од сите што го претставуваат Манчестер Јунајтед. Секојдневно си поставуваме високи стандарди. На „Вембли“ ги исполнивме тие барања и ја добивме наградата за нашиот прв трофеј заедно. Ја знаеме важноста на трофеите низ историјата на овој голем клуб. Многу сме среќни што ќе го вратиме трофејот на „Олд Трафорд“, но во никој случај нема да се задоволиме само со ова и нема да застанеме тука.

– Заедно го доживеавме чувството што значи да се победи за Манчестер Јунајтед. Навистина е величествено и само ќе направи секој од нас да биде уште погладен за поголем успех. Оваа група направи голем напредок во последните неколку месеци, но има уште многу пред нас. Можам да ве уверам дека сите во Карингтон ќе работат постојано, бидејќи знаеме дека овој клуб и вие, нашите навивачи, заслужувате уште прекрасни денови како овој.

– Ќе се вратиме на работа денес, со целосен фокус на подготовките за соочување со Вест Хем во ФА Купот. Нема да има самозадоволство во нашата желба да го вратиме овој клуб таму каде што сакаме да бидеме. Ве молиме да знаете дека вие сте од витално значење за она што сакаме да го постигнеме и земете го вчерашниот ден како доказ за тоа што може да се случи кога сите сме обединети заедно. Ви благодариме за поддршката и посветеноста, Ерик Тен Хаг, – гласи емотивното писмо на Холанѓанецот.