Театарот за деца и младинци денеска го прославува својот 34. роденден

25.03.2024 Mart Ponedelnik

Театарот за деца и младинци – Скопје, првиот и единствен професионален детски театар на македонски јазик, денеска, 25 март го прославува својот 34. роденден, со изведба на претставата „Црвенкапа“ на Фестивалот „5ре“ во Велес.

Како што истакнуваат оттаму, Театарот за деца и младинци – Скопје, сè уште ги создава најважните детски, куклени и младински претстави во поранешниот воен ресторан „Вардар”, преку 34 години неуморна работа, која создава успешни приказни.

Како што воедно посочуваат, постарите генерации го паметат почетокот на ТДМ, пред преполната Универзална сала – Скопје, каде беше изведена претставата „ЧУДОВИШТАТА ОД НАШИОТ ГРАД“ од Русомир Богдановски, а во режија на Коле Ангеловски со која се означи и официјалното институционално работење на Театарот за деца и младинци.

-Низ изминатите години, ТДМ забележува бројни не само домашни, туку и многу важни интернационални успеси. Во постоечкиот објект премиерно е изведена претставата „УБАВИЦАТА И ЅВЕРОТ“ која бележи рекорден број на изведби (над 350), како и останати успешни претстави со над 200 изведби: „ЦРВЕНКАПА“, „ЗРНОТО ГРАШОК И ПРИНЦЕЗАТА“, „ЛАКОМАТА МЕЦА“ и др. Имаме бројни ГРАН ПРИ награди за претстави, меѓу кои во минатото секако се бележи успехот на легендарната „МАКЕДОНСКА ПРИКАЗНА“, потоа следува „ТОБИ” со повеќе значајни награди и многу други претстави, а со претставата „Роња, ќерката на ограбувачот“ само за една година ТДМ се здоби со три ГРАН ПРИ НАГРАДИ, награда од публика за најдобра претстава, актерски награди, награда за оргинална музика. Последните години ансамблот на ТДМ, следејеќи ги современите текови се развива согласно истите и на репертоарот бележи вистински театарски освежувања во секој сегмент од програмата: куклени претстави, детско – играни, а особено се значајни младинските (наменети за возраст од 14+). По бројните гостувања на ТДМ низ Европа, од пред три години успешно го организира и Интернационалниот фестивал на детски театри „Игор Маџиров“, додаваат од ТДМ.