Талески му го донесе на Вардар трофејот во Купот

16.05.2022 Maj Ponedelnik

Со голот на Филип Талески во последните секунди, Вардар го совлада лутиот ривал Еурофарм Пелистер со 23-22, во финалето на Купот одиграно вечерва во Кавадарци.

Скопјани подобро го отворија мечот и поведоа со 8-4, но битолчани со серија од осум гола стекна предност од 12-8 на полувреме. Еурофарм Пелистер успеа да ја зголеми разликата на пет гола, но Вардар се врати во мечот и славеше во неизвесната завршница.

Стрелецот на победничкиот гол, Талески, беше најефикасен во финалето со шест гола, додека Дарко Ѓукиќ забележа пет, а кај Еурофарм Пелистер се истакнаа Јосип Периќ и Елмир Граѓан со по пет погодоци.

За Вардар ова е 15-ти трофеј во Купот на Македонија.

На почетокот на мечот и по завршување на првото полувреме од финалето имаше неколку инциденти во кои беа вклучени навивачите, по што мораше да интервенира и полицијата.