Судиската комисија на ФА му се извини на Евертон за недосудениот пенал против Сити

Предводникот на англиската судиска комисија, Мајк Рајли, денеска разговарал со претставници на Евертон и официјално се извинил поради недосудениот пенал на дуелот со Манчестер Сити.

Судиите не покажаа на белата точка и покрај играњето со рака на Родри во самата завршница, а „карамелите“ побараа извинување бидејќи се оштетени на овој дуел.

Рајли денеска зборувал со менаџерот Френк Лампард и претседателот Бил Кенрајт, извинувајќи се за превидот на главниот судија и неговите колеги во ВАР собата.

Евертон можеше да освои бод со недосудениот пенал, а истиот може да се покаже како одлучувачки во битката за опстанок во која неочекувано се најде клубот од Ливерпул сезонава.

Лампард по натпреварот истакна дека сите виделе дека се работи за пенал, а Пеп Гвардиола првично сметаше дека пеналот не е досуден бидејќи имало офсајд во акцијата.