Србија броеше со 115 и со „три од три“ оди во наредната фаза на СП

Селекцијата на Србија со максимален учинок од „три од три“ ја заврши првата фаза на Светското кошаркарско првенство.

Нашиот сосед во третиот меч во групата Б го уништи составот на Јужен Судан со 32 разлика. Избраниците на Пешиќ ја одиграа најефикасната партија на шампионатот, постигнаа 115 поени (115-83) со што потврдија дека формата е на одлично ниво пред главните битки кои престојат.

Србите постигнаа 17 тројки, 34 асистенции, а кога се во прашање стрелците најефикасни беа играчите од НБА лигата, Богдановиќ и Јовиќ со 23 и 25 поени.

Кај поразените Какол беше автор на 21 поен, некогашниот член на МЗТ Скопје, Омот пак беше автор на 17 кошеви.

Во истиот термин Грузија беше подобра од Венецуела со 70:59 и со тоа обезбеди место во наредната рунда.