Солистички концерт на Дуња Иванова посветен на Ханиа Рани

Во Камерната сала на Филхармонија, на 13 септември, со почеток во 20 часот пијанистката Дуња Иванова ќе одржи солистички концерт посветен на музиката на современата и прогресивна полска композиторка Ханиа Рани.

Ханиа Рани е пијанистка, композиторка и пејачка, авторка на албумите „Есја”, „Дома“, „Музика за филм и театар“ и „Внатрешни симфонии“. Нејзините дела претставуваат фузија на минимализам, експериментирање и импровизација во неокласичен манир. Kонцертира на сцените во Европа, Северна Америка, Австралија и Јапонија.

Дуња Иванова со солистичка и камерна концертна дејност се претставува во Њујорк (САД), Париз (Франција), Сараево (БиХ), Тирана (Албанија), Рагуза (Италија), Приштина (Косово); Подгорица (Црна Гора), на фестивалите Скопско лето, Охридско лето, Денови на Македонската музика, Музика вива, Филмскиот фестивал Браќа Манаки, Струшки вечери на поезијата, настапува со оркестарот на Музичката младина на Македонија и Македонската филхармонија, во камерни состави и во рамките на балетски претстави. Особено значајни се нејзините рецитали посветени на музиката на Збигњев Прајснер, Филип Глас, Лудовико Еинауди, Арво Перт, Руичи Сакамото, Мајкл Најман, Тери Рајли, Стив Рајх, Микаел Сапин, Давид Федел, Бјанка Бан, Јан Тирсен, Макс Рихтер.