Со филмови од фестивалот „Вечери на женски права“ стартува летното кино на Кинотека

Со проекција на документарниот филм „Форте“ (Forte) од програмата на фестивалот „Вечери на женски права“ на режисерот Дејвид Донели на 14 мај, со почеток во 20:30 часот започнува со работа летното кино под отворено небо „Мирно лето“ – во дворот на Кинотеката.

Во рамките на фестивалот „Вечери на женски права“ ќе бидат прикажани и документарните филмови: „Денот на жената“ (Women's Day) на Долја Гавански и „Тоа е тинејџерски свет – вмрежени за секс, лаги и игри на моќ“ (It’s a Teen’s World – Wired for Sex, Lies and Power Trips) на Лин Глазиер.

Програмата на летното кино продолжува со традиционалната Недела на италијански филм која за тема ја има емиграцијата, а ќе бидат прикажани седум филмски наслови: „Леб и чоколадо“ (Pane e cioccolata, 1974) на Франко Брусати; „Новиот свет“ (Nuovo mondo, 2006) на Емануеле Криалезе; „Да ви се претставам? Роко Папалео (Permette? Rocco Papaleo, 1971) на Еторе Скола (Ettore Scola); „Добредојдовте на југ“ (Benvenuti al sud, 2010) на Лука Миниеро; „Сако и Ванцети“ (Sacco e Vanzetti, 1971) на Џулијано Монталдо; „Убав, чесен емигрант во Австралија би се оженил со чесна сограѓанка“ (Bello, onesto, emigrato in Australia sposerebbe compaesana illibata, 1971) на Луиџи Ѕампа и „Тробојката оди на гласање“ (Bianco, rosso e Verdone, 1981) на Карло Верзоне.

Следуваат две вечери со проекции на филмови во рамките на летното издание на Скопје филм фестивал, а на 26 мај (среда) ќе се одржи и церемонијата на доделување на годишната награда на Кинотеката „Златен објектив“.

Годинешни добитници на „Златниот објектив“ – награда на филмски работници кои преку својот професионален ангажман придонеле за создавањето, развојот, промовирањето и популаризацијата на македонската кинематографија се режисерот Коле Манев и монтажерот Спасе Тасевски. Коле Манев (Бапчор, Костурско, Егејска Македонија, 1941) спаѓа меѓу најеминентните македонски сликари, но тој е и расен филмски и телевизиски творец. Спасе Тасевски (Скопје, 1945), пак, од 1965 година работи во РТВ Скопје, прво како асистент-монтажер, а потоа самостојно како монтажер на телевизиската програма.

Во Кинотеката кон крајот на мај ќе започне и 11. издание на Филозофскиот филмски фестивал, кој продолжува и во текот на јуни.

„Јуни, пак, е месец ‘полн како око’ со филмски наслови од Неделата на јапонскиот филм, Неделата на новиот германски филм, проекции на дигитално реставрираните македонски играни филмови ‘Мирно лето’ и ‘Фросина’, како и редица други пријатни изненадувања“, посочуваат од Кинотеката.

Како што додаваат оттаму, билетарата на Кинотека ќе биде отворена секој ден од 19:00 часот, а проекциите, кои ќе се одвиваат со целосно почитување на препораките за заштита од ковид-19, ќе започнуваат во 20:30 часот.