Со доделување на наградата за високо актерско достигнување вечер завршува ФКТ „Ристо Шишков“

Со доделување на наградата за високо актерско достигнување вечерва во Струмица ќе заврши дваесет и деветтото издание на Фестивалот на камерен театар „Ристо Шишков“.

Фестивалското жири, кое го предводи ланската лауретка, актерката Александра Пешевска и актерите Благој Чоревски и Петар Мирчевски, вечер пред полноќ треба да одлучи кому ќе припадне златниот медалјон со ликот на Шишков и паричната награда во износ од 1.500 евра.

Фестивалот продолжи синоќа по тридневен прекин заради прогласената жалост во државата, а пред гледачите и жирито се претставија актерите на кумановскиот театар со „Драма изгубена во времето“ од Сашко Насев во режија на Владлен Александров. По нив на сцената се појавија актерите од тетарот од Плевен, Бугарија, со претставата „Човекот од Подолск“ од Дмитри Данилов, во режија Васил Василев. Претпоследната фестивалска вечер се прикажа претставата „Јами Дистрикт“ на Битеф театарот од Белград, Србија, во режија на Кокан Младеновиќ.

Вечер треба да се одиграат претставите „Само глас“ од Нина Плавањац, во режија на Марјан Неќак, во продукција на МНТ и „Три жени“ од Ведрана Клепица во режија на Роберт Рапоња во изведба на Тигар театар, Театар Форт Форно и Осиечко културно лето од Хрватска.

Фестивалот се одржува во Центарот за култура „Антон Панов“ во Струмица со почитување на ковид протоколите и со исполнетост до 30 отсто од капацитетот.