Скопје танцовиот театар – изненадување во елитниот „Шајо” во Париз

Претставата на Скопје танцовиот театар е најавена во престижниот журнал “La Terrasse”. „Гостувањето во Националниот театар ‘Шајо’ во Париз, Франција, каде што треба да имаме три претстави во ударен термин, е круна на нашето постоење, нашата борба за квалитет и градење на висококвалитетен уметнички профил“, кажа за весникот ВЕЧЕР кореографката и директор на Скопје танцовиот театар Рисима Рисимкин.

„Скопје танцовиот театар првпат настапува во Франција со изненадувачка претстава, која нè носи во земјата на соништата за да зборуваме за нашите актуелнoсти“, вака престижниот журнал за култура „La terrasse“ од Франција го најави настапот на македонските танчари под кореографската палка на Рисима Рисимкин на сцената на Националниот театар за современ танц „Шајо“ во Париз, Франција. Претставата „Идентитети – Историја на еден растегнат сон“ во овој престижен театар на Трокадеро ќе се одржи на 16, 17 и 18 март 2022.

“’Идентитети – Историја на еден растегнат сон’ на Рисима Рисимкин е претстава со една поинаква естетика. Кореографката, која е на чело на Скопје танцовиот театар од 2011 година, е една од најпопуларните и најплодни македонски кореографки. Таа се појавува на големите меѓународни сцени, но е сосема непозната во Франција и затоа ќе биде вистинско откритие, кое ќе го доживееме во ‘Шајо’. Со своите седуммина танчари, таа ја доведува во прашање експресивноста на движењето во време на пандемија. Надвор од оваа општоприфатена тема, Скопје танцовиот театар нè поканува да ги истражуваме имагинарните идентитети, изнесувајќи чудни ликови, запленети од големата интензивност на танцот. Рисимкин неодамна ни се довери дека во овој опус ‘се обидува да најде јазик што функционира во ова нефункционално време. Таа го прифаќа предизвикот да создаде интимен танц во кој танчарите никогаш не се допираат. Водена од софистицирани сценографија и костими, таа ни претставува апокалиптичен свет кој ја истакнува нашата изолација, но ја брани убавината од сите препреки’“, стои во најавата за гостувањето на македонските танчари.

Кореографката Рисимкин, пак, вели: „Гостувањето во Националниот театар ‘Шајо’ во Париз, Франција, каде што треба да имаме три претстави во ударен термин, е круна на нашето постоење, нашата борба за квалитет и градење на висококвалитетен уметнички профил“.

Претставата за која музиката ја напиша Тони Китановски, костимите ги изработи Благој Мицевски, а сценскиот дизајн е на Матеа Мијановиќ, публиката ќе може да ја проследи и на 10 март, на големата сцена на Македонскиот народен театар, пред заминувањето за Париз. Инаку, оваа претстава беше претставена и во предворјето на црквата „Света Софија“, во рамките на минатогодишното јубилејно издание на манифестацијата “Охридско лето“.

„Оваа претстава е вистински одраз на тоа како се чувствуваме, каде оди светот, кој е нашиот, а кој заедничкиот универзум и како, всушност, ние си поигруваме со него и, за жал, не знам каде ќе завршиме. Тоа беше и пораката што сакавме да ѝ ја пренесеме на публиката“, истакна тогаш Рисимкин.

Во претставата настапуваат: Анастасија Данчевска, Мими Поп Алексова, Сара Цветковска, Бобан Русески, Дејан Битровски, Викторија Коцева, Стефани Шааршмит, Андреј Димовски и Емилија Милак.

„Шајо“ е престижен француски театар, еден од симболите на светската културна елита, со еден век постоење. (Д.Т.)

Фото: Архива на Скопје танцовиот театар