Скопје и Музејот на современата уметност – Скопје, синоќа испишаа историја во Виена

Преку 1000 љубопитни посетители беа на големото отворање на изложбата „Ниедно чувство не е конечно. Колекција на солидарноста, МСУ Скопје”/„No Feeling is Final. The Skopje Solidarity Collection“ со дела од уникатната колекција на Музејот на современата уметност – Скопје, која ќе биде отворена се до 28 јануари 2024 година. Посетителите можеа да ја погледнат изложбата за солидарно Скопје и делата, кои светски познатите уметници ги подарија на нашиот Музеј на современата уметност во знак на солидарност по катастрофалниот земјотрес во 1963 година. На 1000 метри квадратни беа изложени импозантните 94 избрани дела од солидарната колекција на МСУ во симбиоза со 50-те дела од шестмината современи уметници. Во изложбениот проект, вклучена е и документарна секција за Скопје, трансформацијата на градот и приказната за МСУ и неговата колекција, документи и макетата на Кензо Танге, позајмени од архивите на Музејот на град Скопје и текстови и макети од позначајни градби од постземјотресната обнова на градот, од архивата на Ана Ивановска, Јован Ивановски и Владимир Десков, кои наедно одржаа и предавање вчера пред виенската публика. На официјалното отворање на изложбата, до присутните се обратија двете директорки на партнерските институции Кунстхале и МСУ, Сабина Саболовиќ и Мира Гаќина и беа поздравени од посетителите со громогласни аплаузи и извици за поддршка. Во Виена пристигна и министерката за култура Бисера Костадиновска Стојчевска, Дејвид Гир, амбасадорот на Европската унија во Македонија, голем дел од дипломатскиот кор во Виена и претставници од македонската амбасада во Австрија. „Скопје и Музејот на современата уметност – Скопје, испишаа историја во Виена“, се дел од коментарите на социјалните мрежи, веднаш по отворањето. „Монументална изложба, чиста емоција, извонреден колорит, моќни дела и сликовит приказ за солидарноста“, возбудено коментираа оние кои беа таму синоќа. Современите уметници вклучени во изложбениот проект: Брук Ендру (Мелбурн), Синиша Илиќ (Белград), Иман Иса (Берлин) и Ѓулсун Карамустафа (Истанбул) и македонското уметничко дуо Јане Чаловски и Христина Иваноска (Скопје), беа во центарот на вниманието синоќа. Изложбата која ќе биде отворена до следната година, а според искуствените статистики кои ги има Кунстхале Виена се предвидува да ја погледнат повеќе од 75.000 илјади посетители од целиот свет.