Сколс конечно импресиониран од Јунајтед, сите заслуги одат во еден правец!

Пол Сколс беше специјален аналитичар на „Би-Ти Спорт“ за фудбалската програма во Лигата на Европа, односно беше присутен и на „Камп Ноу“ каде во живо ги следеше случувањата на највозбудливиот бараж натпревар.

Според многумина, Барселона и Манчестер Јунајтед го одиграа најдобриот и најинтересен натпревар во Европа оваа натпреварувачка сезона, бидејќи покрај четирите видени гола, пресвртите и многуте шанси, преовладуваше и доста квалитет, но и фер игра од актерите на теренот.

Пресметката на „Камп Ноу“ заврши 2:2 и патникот во наредната фаза ќе се решава на „Олд Трафорд“, но поради виденото во Шпанија, Пол Сколс е се поголем оптимист кога е во прашање Јунајтед.

Легендарниот Сколс беше еден од најголемите критичари на Јунајтед последните години, но сега смета дека тимот оди во правилна насока со Ерик Тен Хаг и сите заслуги му ги препишува на менаџерот.

– Каков меч беше ова, каква возбуда за сите. Едноставно не можеше да се земе здив. Двата тима беа неверојатни, ова беше како навраќање на најдобрите денови.

– Тен Хаг најави дека ќе оди по победа и беше во право. Нема да кажам дека ова е најдобриот тим на Барселона, но направивме добра подготовка за реваншот. Она што ме радува највеќе е следното: Јунајтед конечно личи на тим во овој момент. Дојдовме во Барселона, остваривме голем резултат и тоа е заслуга на работата на тренерот. Може да очекуваме добри работи во иднина, – изјави Сколс.